Aqyn Baýyrjan Halıolla Ǵ.Qurmanǵalıev atyndaǵy fılarmonııanyń dırektory bolyp taǵaıyndaldy
ORAL. KAZINFORM — Belgili aqyn Baýyrjan Halıolla «Atameken» óner ordasyna kóshken Ǵ.Qurmanǵalıev atyndaǵy oblystyq fılarmonııanyń dırektory bolyp taǵaıyndaldy.
Oral qalasyndaǵy Ǵ.Qurmanǵalıev atyndaǵy oblystyq fılarmonııa men «Atameken» óner ordasy ońtaılandyrý ádisi boıynsha resmı túrde qosyldy. Budan bylaı «Atameken» óner ordasynyń ǵımaratyna oblystyq fılarmonııa ıelik etedi. Bas ǵımaratqa ákimshilik jáne shyǵarmashylyq top ornalasty.
Baýyrjan Ergenuly 1979 jyly 24 qarashada Batys Qazaqstan oblysy Syrym aýdany Qosoba aýylynda dúnıege kelgen.
2001 jyly Ál-Farabı atyndaǵy Qazaq memlekettik ulttyq ýnıversıtetin jýrnalıstıka mamandyǵy boıynsha bitirgen.
Eńbek jolyn 2001 jyly oblystyq «Oral óńiri» gazetiniń tilshisi qyzmetinen bastaǵan.
2003-2004 jyldary Syrym aýdandyq «Qaınar» gazetiniń bas redaktory, 2010-2012 jyldary respýblıkalyq táýelsiz «Aına» gazetiniń bas redaktory, 2012-2015 jyldary respýblıkalyq «Jaıyq juldyzy» jýrnalynyń bas redaktory boldy.
Mádenıet salasynda 2015-2016 jyldary Jastar shyǵarmashylyǵy ortalyǵy dırektorynyń jalpy máseleler boıynsha orynbasary, dırektory, 2016-2023 jyldary Qadyr Myrza Áli atyndaǵy oblystyq mádenıet jáne óner ortalyǵynyń dırektory, 2023-2024 jyldary «Atameken» óner ordasynyń dırektory laýazymyn atqaryp keldi.
B.Halıolla Feısbýktegi paraqshasynda eki mekeme qosylǵanymen, uzyn sany úsh júzge jýyq qyzmetkerdiń óz jumysyn saqtap qalǵanyn jetkizdi.
«Eshkim sebepsiz jáne kóldeneń qysqartýǵa ushyraǵan joq. Resmı mekeme bolmaı turǵan kezde biraz jobalardy qolǵa alyp, aınaldyrǵan bir aıdyń ózinde dástúrli ánshilermen jáne ansamblmen 45-ke jýyq adammen barlyq 12 aýdandy, orkestrmen 75-ke jýyq adammen bes aýdandy aralap shyqtyq. Bul sapar maqsaty aqıyq ánshi, fılarmonııa esimin enshilegen Ǵ.Qurmanǵalıevtiń 115 jyldyǵyn keshendi túrde atap ótý bolatyn. Atalmysh sharalar aldaǵy kúnde de jalǵasyn tappaq», dep jazdy Baýyrjan Halıolla.
Eske sala keteıik, budan buryn Eldos Safýllınniń BQO bilim basqarmasynyń basshysy bolyp taǵaıyndalǵanyn jazǵan edik.
