Aqyn, «Alash» ádebı syılyǵynyń ıegeri Elýbaı Áýezov dúnıeden ozdy
QYZYLORDA. KAZINFORM –Syr óńiriniń ádebıeti men jýrnalıstıkasynda ózindik qoltańbasyn qaldyrǵan aqyn, Qazaqstan Jazýshylar odaǵynyń múshesi, halyqaralyq «Alash» ádebı syılyǵynyń ıegeri Elýbaı Áýezov dúnıeden ótti.
Elýbaı Jumanuly 1967 jyly Qyzylorda oblysy Syrdarııa aýdanynyń Besaryq aýylynda dúnıege kelgen. N. V. Gogol atyndaǵy Qyzylorda pedagogıkalyq ınstıtýtyn támamdaǵan soń eńbek jolyn týǵan aýylyndaǵy № 147 mektepte qazaq tili men ádebıeti pániniń muǵalimi bolyp bastady.
Onyń shyǵarmashylyq joly keıingi jyldary jýrnalıstıkamen qatar órildi. Jergilikti qos telearnada on jylǵa jýyq qyzmet atqaryp, oblystyq «Syr boıy» gazetinde bólim meńgerýshisi, «El tilegi» gazetinde bas redaktor boldy. Sondaı-aq uzaq jyl «QazAqparat» halyqaralyq aqparat agenttiginiń Qyzylorda oblysy boıynsha menshikti tilshisi retinde óńirdiń tynys-tirshiligin elge jetkizdi.
Aqynnyń týyndylary respýblıkalyq jáne óńirlik basylymdarda jaryq kórip, birqatar jyr jınaǵyna endi. Óleńderi «Jyr tuǵyrym — táýelsizdik», «Besaryq bastaýy», «Súıgen júrek», «Syrdyń syrly sandyǵy» sekildi jınaqtarda jarııalandy. Al «Men tanyǵan tylsym», «Túpsana jańǵyryǵy» atty jeke kitaptary onyń aqyndyq bolmysyn aıqyndaı tústi.
Elýbaı Áýezovtiń jyrlarynda týǵan jerge súıispenshilik, el men jer taǵdyry, adamdyq qasıet pen ómirdiń máni keńinen kórinis tapty. Syr boıynyń tabıǵaty men tynysyn, eldiń muńy men qýanyshyn jyryna arqaý etken aqynnyń shyǵarmashylyǵy týǵan óńirimen bite qaınasyp jatty.
Qalamger retinde ol jýrnalıstıkany el men qoǵam arasyndaǵy altyn kópir sanady. Ár jyldary jazǵan maqalalary men aqparattyq materıaldarynda Syr eliniń áleýmettik-ekonomıkalyq, mádenı jáne rýhanı ómirin keńinen qamtydy.
Elýbaı Jumanulynyń artynda mol ádebı murasy, ár jyldary jaryq kórgen shyǵarmalary men jýrnalıstik eńbekteri qaldy.
Budan buryn belgili jýrnalıst, aqyn, prozashy, Qazaqstan Jýrnalıster odaǵy syılyǵynyń laýreaty, Qazaqstan Respýblıkasynyń «Aqparat salasynyń úzdigi» Jumabek Aıdarbekuly Tabynbaev qaıtys boldy.
