Ákimshilik sot protsesine kimder kúshtep ákelinbeıdi – zań jobasy
«Ashyq» NQA portalynda jarııalanǵan qujatta Ákimshilik quqyq buzýshylyq týraly kodekstiń 790-babyna (Kúshtep ákelý) ózgeris engizý usynylǵan.
«Shaqyrtý boıynsha dáleldi sebeptersiz kelmegen kezde ózine qatysty ákimshilik is júrgizilip jatqan jeke tulǵa ne zańdy tulǵanyń ókili, ákimshilik jaýaptylyqqa tartylatyn kámeletke tolmaǵan adamnyń zańdy ókili kúshtep ákelinýi múmkin. Kúshtep ákelýdiń jalpy merzimi 1 aıdan aspaýǵa tıis», - dep kórsetilgen jańa redaktsııada.
Shaqyrtý týraly habarlamany alǵan tulǵanyń iske qatysa almaýyna dálel bolatyn sebepter:
- adamnyń óz betinshe júrip kelý múmkindigi bolmaıtyn aýrýynyń bolýy;
- jaqyn týystarynyń qaıtys bolýy;
- dúleı zilzala, adamdy belgilengen merzimde kelý múmkindiginen aıyratyn ózge de sebepter;
«Ózine qatysty ákimshilik is júrgizilip jatqan jeke tulǵa shaqyrý boıynsha belgilengen merzimde kelýge kedergi keltiretin dáleldi sebepterdi shaqyrǵan organǵa habarlaýǵa mindetti. Buǵan qosa, kúshtep ákelý túngi ýaqytta júrgizilmeıdi», - delingen qujatta.
Kúshtep ákelý sheshimi isti qaraıtyn sýdıanyń, organnyń uıǵarymy negizinde qabyldanady. Jeke tulǵany sot protsesine ákelý isimen ishki ister jáne sybaılas jemqorlyqqa qarsy is-qımyl jónindegi ýákiletti organ, sondaı-aq ekonomıkalyq tergeý qyzmeti júrgizedi.
«Júkti áıelder, 14 jasqa tolmaǵan balany jalǵyz tárbıelep otyrǵan áıelder men erler, sondaı-aq densaýlyq jaǵdaıyna baılanysty óziniń bolatyn jerinen kete almaıtyn nemese ketpeýge tıis naýqastar kúshtep ákelýge jatpaıdy», - dep jazylǵan jańa redaktsııada.
Sonymen qosa, ýákiletti organdar 16 jáne 18 jasqa tolmaǵan adamdardy olardyń zańdy ókilderine eskertpesten kúshtep ákete almaıdy.
Aıta keteıik, qazirgi zańanama talaptarynda joǵaryda atalǵan erejeler joq.
Qujat 13 naýryzǵa deıin kópshilik talqylaýda bolady.