Ákimshilik polıtsııa: Júrgizýshilerdiń kólik qozǵalysyn ózdigimen retteýi - qaýipti
ASTANA. QazAqparat - QR ІІM Ákimshilik polıtsııa komıtetiniń baspasóz hatshysy Irına Lýkıanına kólik qozǵalysy qıyndaǵan joldarda keı júrgizýshilerdiń qozǵalysty erikti túrde retteýine qatysty pikir bildirdi, dep habarlaıdy QazAqparat tilshisi.
«Kóshe qıylystarynda qozǵalysty retteýdi óz qolyna alatyn azamattarǵa kópshiliktiń eljirep qaraýy durys emes. Bul erikti-retteýshi úshin de, kóshe qıylysyndaǵy barlyq avtojúrgizýshiler úshin de qaýipti. Dál osyndaı «retteý» saldarynan jol-kólik oqıǵasy oryn alsa, joldan ótken jaıaý júrginshini kólik qaǵyp ketse, kim kináli bolady, jaýapkershilik kimge artylady? Bul esh qaljyń emes», - dep jazdy ol Facebook jelisinde.
Baspasóz hatshysy azamattardan «oılanbaı qadam jasaýdan» aýlaq bolýdy ótindi. «Іsten shyqqan baǵdarsham týraly 102 telefonyna habarlaý kerek jáne qıylystan ótkende basymdyqqa ıe jol belgilerine súıengen jón», - dep atap ótti ol.
