Ákimshilik polıtsııa komıteti tóraǵasynyń orynbasary Jandos Muratálıev ómirden ótti
ASTANA. QazAqparat – ІІM Ákimshilik polıtsııa komıteti tóraǵasynyń orynbasary Jandos Dúısebaıuly Muratálıev ómirden ótti, dep habarlaıdy QazAqparat.
«QR ІІM Ákimshilik polıtsııa komıteti tóraǵanyń orynbasary Jandos Dúısebaıuly Muratálıevtiń (02.01.1975-13.06.2023) uzaq naýqastan keıin qaıtys bolýyna baılanysty týǵan - týystary men otbasyna qaıǵylaryna ortaqtasyp kóńil aıtady. Bul orny tolmas qazada qaıǵylaryna shyn júrekten ortaqtastyǵymyzdy bildirgimiz keledi. Bul – bárimiz úshin mezgilsiz kelgen qaıǵy, ókinish...», – delingen komıtet habarlamasynda.
Polıtsııa polkovnıgi Jandos Muratálıev 1975 jyly 2 qańtarda Almaty oblysynda dúnıege kelgen.
1997 jyly ál-Farabı atyndaǵy Qazaq ulttyq ýnıversıtetin bitirgen. Mamandyǵy – zańger.
2016 jyly L.B. Goncharov atyndaǵy Qazaq avtomobıl-jol ýnıversıtetin bitirgen. Mamandyǵy boıynsha biliktiligi: tasymaldaýdy uıymdastyrý, qozǵalys jáne kólik quraldarynyń jumysy. Dıplom boıynsha biliktiligi: Tehnıka ǵylymdarynyń magıstri.
1997 jylǵy qazan aıynan 2008 jylǵy maýsym aralyǵynda – Almaty q. ІІD, QІІB tergeýshisi, aǵa tergeýshisi boldy.
2008 jylǵy maýsym aıynan 2010 jylǵy aqpan aralyǵynda – Almaty q. jáne Almaty oblysy boıynsha Kedendik baqylaý departamentinde qyzmet etti.
2010 jylǵy aqpan aıynan 2013 jylǵy qazan aralyǵynda – Almaty q. ІІD Jol polıtsııasy basqarmasynyń bólim bastyǵy, basqarma bastyǵynyń orynbasary qyzmetin atqardy.
2013 jylǵy qazan aıynan 2021 jylǵy shilde aralyǵynda – Almaty q. PD Ákimshilik polıtsııa basqarmasy bastyǵynyń orynbasary, basqarma bastyǵy boldy.
2021 jylǵy shilde aıynan qazirgi ýaqytqa deıin – QR ІІM Ákimshilik polıtsııa komıteti tóraǵasynyń orynbasary qyzmetin atqardy.
Qyzmette qol jetkizgen jetistikteri úshin Іshki ister mınıstrligi basshylyǵy birneshe ret marapattady.
