Ákimshilik kodekske engiziletin ózgerister birinshi oqylymda maquldandy

NUR-SULTAN. QazAqparat – QR Parlamenti Májilisi Ákimshilik quqyq buzý týraly kodekske engiziletin ózgerister men tolyqtyrýlardy birinshi oqylymda maquldady, dep habarlaıdy QazAqparat tilshisi.

Atalǵan kodekske 4 baǵytta túzetýler engiziledi.

«Birinshiden, Konstıtýtsııalyq sottyń qurylýyna baılanysty Konstıtýtsııalyq keńes pen onyń músheleri atalǵan baptarǵa olardy Konstıtýtsııalyq sot jáne onyń sýdıalaryna aýystyrý turǵysynda naqtylaıtyn túzetýler usynylyp otyr.

Ekinshiden, zań jobasynda Esep komıtetiniń ataýyn Joǵary aýdıtorlyq palataǵa aýystyrýdy naqtylaıtyn túzetýler kózdelgen.

Úshinshiden, saılaý týraly Konstıtýtsııalyq zańǵa túzetýlerdi saılaý aldyndaǵy úgit júrgizýge jáne úgit materıaldaryn taratýǵa qatysty ákimshilik quqyq buzýshylyq quramdarymen baılanystyrý maqsatynda zań jobasynda kodekstiń 112 jáne 113-baptaryna túzetýler kózdelgen.

Tórtinshi jáne sońǵy baǵyt kodekstiń 874-1-babyn Konstıtýtsııanyń 83-1-babynyń adam quqyqtary jónindegi ýákildi Senattyń kelisiminsiz sot tártibimen qoldanylatyn ákimshilik jazalaý sharalaryna tartýǵa bolmaıdy degen bóligine sáıkes keltirýdi kózdeıdi», - dedi zań jobasyn tanystyrǵan Ádilet mınıstri Qanat Mýsın.

Depýtattar qujatty birinshi oqylymda maquldaý jóninde sheshim qabyldady.