Ákimshilik kedergilerdi joıýdy kózdeıtin I-Azamat jobasy iske qosylady

Bul týraly búgin Ortalyq kommýnıkatsııalar qyzmetindegi baspasóz máslıhatynda «Qazaqstan-2050» jalpyulttyq qozǵalysy keńesiniń tóraǵasy Danat Jumın málim etti.

«Memlekettik qyzmet kórsetýdiń qoljetimdiligin arttyryp, sapasyn jaqsartyp, jemqorlyqqa jaǵdaı týǵyzatyn ákimshilik kedergilerdi joıýdy kózdeıtin I-Azamat jobasyn daıyndap jatyrmyz. Joba iske qosylǵannan keıin halyq úshin mańyzdy qyzmetterdi alýda adamdardyń aldynan kezdesetin kedergilerdi aıqyndaımyz. Osydan keıin memlekettik organdarmen birlese kemshilikterdi joıý baǵytynda jumys istemekpiz»,-dedi ol.

Osy oraıda D. Jumın qanatqaqty joba retinde I-Azamat aıasynda Astana men Qaraǵandy qalalary tańdalǵanyn jetkizdi. Bul qalalarda azamattyq quzyret mektepterin uıymdastyrý kózdelip otyr.

«Atap aıtqanda, ár adam osy mektepke jazyla alady. Ondaǵy dárister aqysyz bolady. Bir aı boıy biz osy adamdardy oqytyp, dáristerge densaýlyq saqtaý, bilim berý jáne ózge de vedomstvolardyń ókilderin shaqyramyz. Nátıjesinde memlekettik qyzmetter jaıynda egjeı-tegjeıli málimetterdi beremiz»,-dedi ol.