Ákimshilik is júrgizý kodeksiniń jobasy Májilis depýtattarynyń qolyna tıdi
ASTANA. Jeltoqsannyń 7-si. QazAqparat /Aıdyn Báımen/ - Úkimetten Májiliske Ákimshilik is júrgizý kodeksiniń jobasy kelip tústi,
dep habarlaıdy QazAqparat.
Ákimshilik is júrgizý kodeksi oǵan ákimshilik is júrgizý qatynastarynyń sýbektileri ókilettik bergen memlekettik basqarý salasyndaǵy ákimshilik daýlar týraly jáne ákimshilik quqyq buzýshylyq týraly naqty isterdi sheshý jónindegi is júrgizý qyzmetin retteýge baǵyttalǵan. Sondaı-aq atalǵan qujat ákimshilik sottarda adam men azamattyń quqyqtaryn, bostandyqtaryn jáne zańdy tulǵalardyń zańmen qorǵalatyn múddelerin memlekettik organdardyń zańsyz sheshimderi men áreketterinen qorǵaý tártibin reglamentteıdi.
Kodeks jobasy «Jalpy erejeler», «Ákimshilik daýlar boıynsha is júrgizý», «Ákimshilik quqyq buzýshylyq týraly ister boıynsha is júrgizý» bólimderinen quralǵan. Kodeks jobasy 430 baptan turady.
Kodeks jobasyn qabyldaý keleńsiz áleýmettik-ekonomıkalyq saldarlarǵa ákep soqpaıdy, al ákimshilik jaýaptylyqqa tartý jáne sottardyń ákimshilik daýlardy qaraýymen baılanysty qoǵamdyq qarym-qatynastardy retteý tıimdiligin arttyrýǵa járdemdesetin bolady.
