Ákimshilik aıyppuldardyń eń kóbi Mańǵystaý, Batys Qazaqstan jáne Shyǵys Qazaqstan oblystarynda óteldi
ASTANA. QazAqparat - 2015 jyldyń 1 qańtarynan bastap, Qazaqstan Respýblıkasynyń ákimshilik quqyq buzýshylyqtar týraly jańa kodeksin qoldaný aıasynda elimizde 3 906 664 ákimshilik quqyq buzýshylyq tirkeldi, bul 2014 jyldyń uqsas merzimine qaraǵanda 15%-ǵa artyq. Bul týraly 11 aıdyń qorytyndysy boıynsha QR Bas prokýratýrasy Quqyqtyq statıstıka jáne arnaıy esepke alý jónindegi komıtet málimetenen habarlandy.
Atap aıtqanda, jańa Ákimshilik kodeksinde buzýshylyqqa «eskertý» túrinde jaza qoldanatyn baptardyń sany kóbeıdi, shaǵyn bıznes sýbektisine salynatyn aıyppuldardyń somasy azaıdy, sondaı-aq qysqartylǵan óndirister men jeńildikter engizildi. Demek, osy jyly «eskertý» túrinde jaza qoldaný 34%-ǵa kóbeıdi, bul jaza 647 644 quqyq buzýshyǵa qatysty shyǵaryldy. Memlekettik organdar aıyppul salý týraly qaýlyny 2%-ǵa az shyǵardy, oǵan qatysty 55,8 mlrd. teńge somasynda 2 725 402 quqyq buzýshy jaýapty boldy. Quqyq buzýshylyq jasaǵan adam óz kinásin moıyndap, aıyppul qunymen kelise otyryp, 7 táýlik ishinde aıyppul somasynyń 50%-yn tólegen jaǵdaıdaǵy ákimshilik is júrgizýdiń engizilgen qysqartylǵan tártibi memleket qazynasyna 5,6 mlrd. teńge engizýge múmkindik berdi. Bul quqyq buzýshylardyń ózderi de osynshama únemdep qaldy degendi bildiredi. Barlyq salynǵan aıyppul somasynan 51 paıyzy nemese 28,5 mlrd. teńge óndirildi. Sondaı-aq, osy jyly quqyq buzýshylar 6,4 mlrd. teńgeden artyq somada ótken jyldardyń aıyppuldary boıynsha 71 myń qaýlyny oryndady. Jalpy ótken kezeń boıynsha ákimshilik aıyppuldardy óteý esebimen memleket bıýdjetine 35 mlrd. teńgeden artyq soma kelip tústi. Belgili bolǵandaı, óńirler boıynsha ákimshilik aıyppuldardyń eń kóp ótelýi Mańǵystaý (83%), Batys Qazaqstan (71%) jáne Shyǵys Qazaqstan (70%) oblystarynda jáne Astana qalasy boıynsha (69%) kórinip otyr.
