Ákimshilik aıyppuldardan jaltarǵandardyń shetelge shyǵýlaryna tyıym salynýy múmkin
ASTANA. 10 aqpan. QazAqparat - Birneshe márte ákimshilik aıyppuldardan jaltarǵandardyń endi shetelge shyǵýlaryna tyıym salynýlary múmkin.
Bul týraly búgin Astanadaǵy baspasóz máslıhatynda QR Bas prokýratýrasy Quqyqtyq statıstıka jáne arnaıy esepke alý jónindegi komıtetiniń tóraǵasy Marat Ahmetjanov málim etti.
«Ótken jyly ákimshilik tájirıbe sýbektileri 2 mln. 700 myń quqyq buzýshylyqty esepke qoıdy. Osy quqyq buzýshylyqtyń (2,3 mln.) basym bóligin ishki ister organdary anyqtady. Sottar 87 myń adamdy ákimshilik aıypqa tartty»,-dedi tóraǵa. Onyń sózinshe, quqyq buzýshylyqtyń kóbisi kólik salasynda tirkeldi.
«Jalpy ákimshilik tájirıbe sýbektileri 2011 jyly 102,4 mlrd. teńgege aıyppul saldy. Onyń ishinde tek 29 mlrd. teńgesi ǵana nemese 28 paıyzy tólendi»,-dedi komıtet basshysy. Bul aıyppuldardyń basym bóligi jalǵan kásiporyndarǵa baılanysty.
Osy oraıda ol atalǵan ákimshilik aıyppuldardyń oryndalýy tártibin jetildirý máselesi kóldeńinen qoıylǵanyn jetkizdi.
«Ákimshilik aıyppuldardy tóleýden jaltarǵan azamattarǵa qatysty joba engizip otyrmyz. Qazirgi kezde bizde ákimshilik quqyq buzýshylyqtar jóninde málimetter bazasy bar. Bul aıyppuldardy tóletýge baılanysty sot qaýlylaryn oryndaýdy yntalandyrý úshin paıdalanýy múmkin»,-dedi ol.
M. Ahmetjanovtyń aıtýynsha, damyǵan elderdegi sekildi birneshe márte ákimshilik aıyppuldardy oryndamaǵandar shetelge týrıstik nemese kommertsııalyq negizde shyǵarylmaýy yqtımal. Bul sharalar tek sot qaýlylaryn oryndamaı kelgen quqyq buzýshylarǵa qatysty qoldanylýy múmkin.
«Osy másele boıynsha bizdiń usynystar jasaldy. Ádilet mınıstrliginde ony zańnamalyq qalypqa keltirý qarastyrylýda»,-dep túıindedi komıtet basshysy.
