Ákimshilik aıyppuldan túsken qarajat qaıda jumsalady

NUR-SULTAN. QazAqparat – Para berip bireýdi baıytqansha, salynǵan aıyppuldy ótep bıýdjetti tolyqtyrǵan durys. Sybaılas jemqorlyqqa qarsy is-qımyl agenttiginiń seriktestik departamentiniń dırektory Rasýl Medetov osyndaı pikir bildirdi, dep habarlaıdy QazAqparat tilshisi.

«Sybaılas jemqorlyq degen kezde kóp adamnyń esine jol polıtsııasy qyzmetkerleri túsedi. Biraq adam ózin de kinálaı bilýi kerek. Bul sózime kelisetinder de, kelispeıtinder de tabylatynyn bilemin. Máselen, jol erejesin belgili bir adam buzǵannan keıin ony jolpol qyzmetkerleri ustaıtyn bolsa, jol erejesin buzǵan azamat parany ózi usynady. «Keliseıik» deıdi de, belgili bir parasyn berip, jónine ketedi. Ketkennen keıin «búkil polıtsııa ońbaǵan, olar jemqorlyqqa jol beredi» deıdi. Ózderi bastaıtynyn eskere bermeıdi», - dedi Rasýl Medetov agenttiktiń Feısbýk paraqshasyndaǵy suhbatta sóılegen sózinde.

Onyń aıtýynsha erejeni buzǵan adam aıyppuldy tóleýi kerek.

«Nege biz basqa bireýdi baıytýymyz kerek. Aıyppul jazyp bersin. Aıyppul bıýdjetke barady. Bıýdjetke barǵan qarajat halyqqa qaıtyp keledi. Qalaı keledi: ol aqshaǵa balaqbaqsha nemese aýrýhanaǵa salynýy múmkin. Jol jóndelýi yqtımal. Sondyqtan aıyppuldy bıýdjetke joldap, aqsha balalarǵa qaıtyp keletindeı jaǵdaı jasaý kerek», - dedi ol.