Ákimniń jumysy óte qyzyqty - Baqyt Sultanov
ASTANA. QazAqparat - Úkimettiń búgingi otyrysynan keıin Astana qalasynyń ákimi Baqyt Sultanov jańa qyzmeti týraly aıtyp berdi, dep xabarlaıdy QazAqparat tilshisi.
«Árıne, bul jumys óte qyzyqty. Bir jaǵynan joǵary talaptar qoıylyp otyr. Sebebi Astana ósip keledi, xalyqtyń sany da kóbeıip jatyr. Sondyqtan qyzmet kórsetý sapasyn da arttyrý qajet. Ótken jetide Elbasy aktıvpen bolǵan kezdesý kezinde biraz máselelerdi kóterip, naqty tapsyrmalar berdi. Sonyń ishinde elordany damytýdyń jańa modelin ázirleý mindeti bar. Osyǵan baılanysty ákimdik qysqa ýaqyttyń ishinde Astanany damytýdyń 2050 jylǵa deıingi strategııasyn usynýy qajet. Biz osy jumysty bastap kettik», - dedi B.Sultanov jýrnalısterge bergen suxbatynda.
Ákimniń aıtýynsha, alda turǵan negizgi mindetterdiń biri - qysqa daıyndyq. Osy ýaqytqa deıin birneshe jınalys ótti.
«Men ózim tıisti mekemelerdi aralap shyqtym. Daıyndyq jaǵynan barlyq jumystar atqarylyp jatyr. Sondyqtan qala turǵyndaryn eshqandaı problemalarǵa jol bermeımiz dep sendirgim keledi», - dep atap kórsetti B.Sultanov.
