Ákimniń tapsyrmasy: Eki aptada Qaraǵandynyń damý strategııasy ázirlenbek
ASTANA. QazAqparat - Qaraǵandy oblysynyń ákimi Erlan Qoshanov apparattyq jınalys barysynda Prezıdenttiń aımaqqa is-sapary barysynda berilgen Elbasynyń tapsyrmasyn oryndaý boıynsha atqarylatyn jumystar týraly aıtty. Bul týraly óńirlik ákimdiktiń baspasóz qyzmeti habarlaıdy.
Ár baǵyttar boıynsha naqty sharalar qurý qajet bolady. Olardyń júzege asyrylýyn oblys ákimi jeke baqylaýǵa alady.
Erlan Qoshanov oblys ortalyǵynyń damýyna qatysty máselege erekshe toqtaldy.
«Biz Elbasyn Qaraǵandynyń jańa ortalyǵyn damytý josparymen tanystyrdyq. Prezıdent bul bastamany qoldady jáne bizdiń aldymyzǵa Qaraǵandyny mıllıon turǵyny bar qalaǵa aınaldyrý boıynsha mindetteme qoıdy. Osy maqsatta qalany damytý Strategııasy men ony júzege asyrý boıynsha Jol kartasyn qurý tapsyrmasy berildi», - dep atap ótti ol.
Erlan Qoshanov óziniń birinshi orynbasary men Qaraǵandy qalasynyń ákimine eki aptalyq merzimde qujattardyń jobalaryn qurýdy jáne olardy talqylaýǵa shyǵarýdy tapsyrdy.
Jańa áleýmettik nysandardy josparlaý barysynda qala turǵyndarynyń sany artatynyń eskerý qajet, dep atap ótti ol. Basym jobalardyń biri Qaraǵandynyń úshinshi jylý shyǵarýyshynyń qurylysy bolyp tabylady. Oblys ákimi qarjylandyrý máselesin sheshýdi tezdetýdi tapsyrdy.
«Bul jobany júzege asyrmaıynsha qalany damytý múmkin emes - bizge barynsha qajetti energııa qýattary qajet bolady. Eki-úsh jyldan soń jylý shyǵarýshy nysan jumys istep turýy tıis», - dedi Erlan Qoshanov.
Turǵyn úı qurylysyn damytý úshin ol jeke qurylys kompanııalarmen jumysty belsendirek etýdi talap etti. Erekshe nazarda «aqyldy qala» jobalary men sandyq júıege aýysý jobalary bolady.
Oblys ákimi sonymen qatar Qaraǵandy, Temirtaý jáne Jezqazǵan qalalaryndaǵy gaz taratqysh jelilerdiń qurylysyna qatysty tapsyrmalar berdi. Temirtaýdaǵy JEO-2 jańǵyrtý boıynsha josparlardyń oryndalýy erekshe baqylaýǵa alynady. Erlan Qoshanov qaı baǵyttar boıynsha jumystar údetiletini týraly toqtaldy: olar - ekologııalyq jaǵdaıda jaqsartý, halyqty sapaly aýyz sýmen qamtamasyz etý, ınvestıtsııalardy jumyldyrý, týrızmdi, shaǵyn jáne orta bıznesti damytý, jastardy jumyspen qamtý.
«Bul atqarylatyn jumystar. Biz qarqyndy údetýimiz qajet. Baǵyttar anyqtaldy, endi olardyń árqaısysy boıynsha naqty sharalar josparlaryn daıyndańyzdar», - dep talap etti Erlan Qoshanov.
Esterińizge sala keteıik, 6-7 qyrkúıekte el Prezıdenti Nursultan Nazarbaev is-saparymen Qaraǵandy oblysynda bolyp qaıtqan edi. Elbasy Dostyq úıinde aımaqtyń áleýmettik-ekonomıkalyq damýy máseleleri boıynsha jınalys ótkizdi, onda birqatar naqty tapsyrmalar berdi.
