Ákimniń saparynan keıin Óskemende tórt mektep jóndeletin boldy
ÓSKEMEN. QazAqparat - Óskemende qala basshysy qonaqta bolǵan mektepterdiń barlyǵy jóndeýdi qajet etetini anyqtaldy, dep habarlaıdy QazAqparat altaynews.kz saıtyna silteme jasap.
Senbi kúni qala basshysy Jaqsylyq Omar birneshe áleýmettik nysanda bolyp, olardyń jumysymen tanysty
Óskemen ákimi aldymen qaladaǵy Sátbaev dańǵylyn qıyp ótip jatqan Sheshek ózeniniń kóktemde sý tasqynyn týǵyzý qaýpi bar ýchaskesine bardy. Tasqynnyń aldyn alý jumystarymen tanysqan soń, byltyrǵy jaǵdaı qaıtalanbas úshin tıisti mamandarǵa naqty tapsyrmalar júktedi.
Keıin Jaqsylyq Omar atalǵan Sátbaev dańǵylynyń boıynda ornalasqan kópqabatty bes úıdiń jáne Vınogradov kóshesindegi 6 úıdiń aýlaishilik aýmaqtaryn aralap kórdi. Bul aýlalarda úıler meılinshe tyǵyz ornalasqan ári oınaıtyn bala da kóp.
«Búgin qalalyq sala basshylarymen birge kelesi jyly qaıta jóndeýdi qajet etetin aýlalardy qarastyrdyq. Birinshi kezekte tozyp turǵan jáne qala ortalyǵynan alys jatqan aýdandardyń aýlalary zaman talabyna saı jańǵyrtylatyn ári keńeıtiletin bolady», - dedi Óskemen qalasynyń ákimi.
Sonymen qatar bul kúni qala basshysy oblys ortalyǵynyń ár yqsham aýdanynda ornalasqan №17 orta mektepte, №10 mektep-gımnazııada, №34 mektep-lıtseıde jáne №20 orta mektepte bolyp, bilim ujymdarynyń jumysyna jáne ǵımarattardyń qazirgi jaı-kúıine qanyqty.
Kezdesýler barysynda bilim oshaqtarynyń barlyǵyna jóndeý jumystarynyń qajettigi belgili boldy. Olardyń keıbiri salynǵaly beri eshqandaı jóndeý kórmese, endi biriniń jertólesine jyl saıyn kóktemde sý tolady. Anyqtalǵan túıitkilder boıynsha qala ákimi Jaqsylyq Omar tıisti sala basshylaryna tapsyrmalar berdi.
