Ákimniń orynbasaryna kartoptyń túri unamaı qaldy
ASTANA. QazAqparat - Pavlodar oblysy ákiminiń orynbasary Baýyrjan Qasenovke «Arzandaý» áleýmettik dúkenindegi kartoptyń túri unamaı qaldy, dep habarlaıdy pavlodarnews.
Óńir basshysynyń orynbasary áleýmettik dúkenderge at basyn buryp, jýrnalıstermen birge azyq-túlik baǵalaryn qarap shyqty.
«Maǵan dúkendegi kartop unamady. Kartop jaman emes, biraq men budan da sapaly bolǵanyn qalaımyn. Jetkizýshiler taýardy naryqtyq jáne áleýmettik dep bólmeýi kerek. Bul jaǵdaıǵa baǵanyń aıyrmashylyǵy áser etip otyr. Biz arzan baǵaǵa qoıatyn bolsaq, taýardyń sapasy da tómendeıdi. Sondyqtan óte tómen qoıdyra almaımyz. Bul ispen aýyl sharýashylyǵy basqarmasy jumys jasaıtyn bolady. Kartoptyń sapasy nashar bolsa, taýar keri qaıtarylady», - dedi Baýyrjan Qasenov.
Sonymen qatar, Baýyrjan Qasenov ákimdikpen memorandým jasaǵan sharýashylyqtarǵa arnaıy BAQ ókilderimen barýdy usyndy. Jumysty jaqsy istep jatqan jáne memorandým shartyn oryndamaǵan, baǵany ózgertip jatqan kásipkerlerdi anyqtaý qajet ekenin atap ótti.
«Halyq jaqsy jáne nashar jumys istep jatqandardy bilýi kerek. Sol jerde sharýa ıeleri nege olar óz halqyna sapasy tómen ónimdi ótkizip otyrǵanyn túsindirsin. Kórshileri, dostary, áriptesteri, tanystary kórsin. Qazirgi kezde dál sondaı sharýa qojalyqtary bar. Mysal retinde sapasy tómen taýar jetkizgen aqsýlyq «Ývanova» jeke kásipkerligin aıtýǵa bolady, - deıdi ákimniń orynbasary.
Oblystyq aýyl sharýashylyǵy basqarmasy basshysynyń mindetin atqarýshy Marat Shuǵaevtyń aıtýynsha, memorandýmǵa sáıkes aqpan aıynan bastap kartoptyń baǵalary 100 teńgeden aspaýy kerek.
«Aqpanǵa deıin 70 teńge bolsa, aqpannan keıin baǵany kóterý kelisilgen. Endi osy baǵa saqtalady. Qorda áli 8 myń tonna kartop bar. Sońǵy kezde sharshýashylyqtar sapasy tómen kartoptar ákelýde. Onymen aınalysatyn bolamyz»,- dedi Marat Shuǵaev.
