Ákimniń orynbasary qaǵyp óltirgen jigittiń ákesi sheneýnikti jazalamaýdy surady
ÓSKEMEN. QazAqparat - Shyǵys Qazaqstannyń Rıdder qalasynda adam ólimine ákep soqtyrǵan kólik apatyna qatysty sottyń alǵashqy otrysy ótti. Marqumnyń ákesi Vıktor Smolnıkov sottan eks-sheneýnikti bas bostandaǵynan aıyrmaýdy surady, dep habarlaıdy QazAqparat tilshisi.
Atyshýly iske qatysy bar delingen Óskemen qalasynyń ákimi Qýat Tumabaev belgisiz sebeppen sot otyrysyna kelmeı qaldy. Ol buǵan deıin sot protsesine kedergi keltirmeý úshin aqysyz eńbek demalysyna ketetinin málimdegen bolatyn.
Sotta Óskemen ákimi basty kýáger retinde jaýap berýi kerek bolǵan. Onyń qatyspaýy saldarynan sot úkimi shyqpaı qaldy. Sotta qaıtys bolǵan jigittiń ákesi sóz alyp, kúdikti retinde qamaýǵa alynǵan Rıdder qalasy ákiminiń burynǵy orynbasary Baýyrjan Qurmanbaevty bas bostandyǵynan aıyrmaýdy surady.
«Men Qurmanbaevqa bas bostandyǵynan aıyrý jazasyn qoldanbaýlaryńyzdy suraımyn. Mundaı sheshimge kelýime eshqandaı aqshanyń qatysy joq. Eshkim májbúrlegen de joq. Qurmanbaevtyń týystary keshirim suraı kelgen kezde olardyń da jaǵdaıymáz emes ekenin kórdim» - dedi Vıktor Smolnıkov.
Degenmen ol eks-sheneýnikti keshirmegenin QazAqparat tilshisine aıtty.
«Men ony bas bostandyǵynan aıyrmaýdy suraǵanymmen, keshirdim degen sóz emes. Onyń da meniń ulym sııaqty balalary, men sııaqty ákesi bar eken. Sony eskerip, sottan bas bostandyǵynan aıyrmaýdy suradym» - dedi marqumnyń ákesi.
Erteń 14.30 da ekinshi sot otyrysy bolady.
