Ákimniń bilim granttary qalaı taratylady
ASTANA. QazAqparat - Eýrazııa ulttyq ýnıversıteti kásiptik baǵdar berý jáne testileý ortalyǵynyń bastyǵy Maqsat Aralxanov ákim granttaryn taratýdyń tártibi týraly aıtyp berdi , dep xabarlaıdy QazAqparat tilshisi.
"Aımaqtarda nemese qalalarda qandaı mamandyqtar tapshy? Ákimdikter sonyń bárin zerdelep, sol mamandyqtarǵa qosymsha grant bólip otyrady. Endi, men basqa óńirlerdi aıta almaımyn. Al Astana qalasynyń ákimdigi pedagogıka, densaýlyq saqtaý, aqparattyq texnologııalar, onyń ishinde avtomattandyrý men basqarý, aqparattyq júıeler, esepteý texnıkasy jáne texnologııasy, sonymen qatar, kólik qozǵalysy men tasymaldy uıymdastyrý, ınjenerlik júıeler, sáýlet, dızaın, mektepke deıingi oqytý men bastaýysh mektep mamandyqtaryna qosymsha grant bóldi. Budan bólek, fızıka, bıologııa, matematıka men ınformatıkany aǵylshyn tilinde oqytý da bar", - dedi M.Aralxanov QazAqparat tilshisine bergen suxbatynda.
Onyń aıtýynsha, ákim granttary sol óńirge baılanyp turmaıdy. Jergilikti atqarýshy organ tapsyrys bergen mamandyq bolsa, respýblıka boıynsha kez kelgen joǵary oqý ornynda bilim alýǵa bolady. Biraq oqýdan keıin ol jerge qaıta baryp, jumys isteý kerek.
"Máselen, Astana qalasynyń ákimdigi "Mektepke deıingi oqytý jáne tárbıeleý" jáne "Bastaýysh mektepte oqytýdyń ádistemesi" boıynsha qosymsha granttar bólip berdi. Biraq ony jalǵyz biz ǵana emes, Pavlodar ýnıversıteti, Qaraǵandy ýnıversıteti, Eýrazııa gýmanıtarlyq ınstıtýty, Turan-Astana, jalpy respýblıkanyń basqa da ýnıversıtetteri ala alady. Jańaǵy eki mamandyq bolsa, jetkilikti. Biraq grant ıegeri Astana ákimdiginiń esebinen oqıdy. Al oqýdy bitirgennen keıin kelisimshartqa sáıkes, osy Astana qalasynyń mektepterinde úsh jyl jumys isteýi tıis", - dep atap kórsetti M.Aralxanov.
Ákim granttaryn arnaıy komıssııa taǵaıyndaıdy. Onyń quramyna ákimniń ózi, áleýmettik qorǵaý ókilderi, qarjy mekemeleri, qoǵamdyq uıymdar men buqaralyq aqparat quraldary kiredi. Іrikteý kezinde úmitkerdiń upaı sanyna basa nazar aýdarylady. Biraq áleýmettik jaǵynan az qamtylǵandarǵa jeńildik beriledi. Qujat qabyldaý 10 tamyzǵa deıin júrgiziledi. Odan keıin komıssııa óz jumysyna kirisedi.
Aıta keteıik, bıyl memlekettik bilim granttaryna qosymsha jergilikti atqarýshy organdar esebinen 2 700-ge jýyq grant bólinip otyr.
"Normatıvtik bazamyz daıyn. Bul granttar aıdyń aıaǵyna deıin taratylady», - dedi E.Saǵadıev Úkimet otyrysynda. Mınıstrdiń aıtýynsha, bıyl ulttyq biryńǵaı testileý men keshendi testileýdi tapsyrmaǵan, ıa bolmasa, shekti deńgeıden asa almaǵandar úshin 15-19 tamyzda qosymsha testileý uıymdastyrylady.
