Ákimmen birge tańǵy as: Bolat Baqaýov kásipkerlermen beıresmı kezdesti
PAVLODAR. QazAqparat - Pavlodar oblysynyń ákimi Bolat Baqaýov bıznes salasyndaǵy túıtkilderdi anyqtaý maqsatynda 80-nen astam kásipkerdi iskerlik tańǵy asqa shaqyrdy, dep habarlaıdy QazAqparat pavlodarnews.kz saıtyna silteme jasap.
Bolat Baqaýov kásipkerlerge qyzyqtyrǵan barlyq suraqtaryn qoıýdy usyndy. Onyń aıtýynsha, búgingi kúni bılik halyqpen túrli tásilder arqyly, onyń ishinde onlaın-rejimde tildesýge tyrysýda. Al Pavlodar oblysynyń bıznesmenderimen keri baılanys ornatý úshin jeke alańdar qurý josparlanyp otyr.
«Men árbir kásipkerge jeke kóńil aýdaramyn. ShOB ókilderi belsendi jáne tıimdi jumys jasaýy úshin bizge ne isteý kerektigin aıtyńyzdar. Biz jeke sektordy qoldaý men yntymaqtastyqtyń barlyq nusqalaryn qarastyrýǵa daıynbyz. Sizder kez kelgen suraqty qoıa alasyzdar. Al, biz jaqyn arada olarǵa jaýap beremiz», - dedi aımaq basshysy.
Kásipkerler bul qarym-qatynastyń formatyn qoldady. Tańǵy asta kezdesý olardyń kópshiligine tek óz oılarymen bólisip qana qoımaı, áleýetti seriktestermen jolyǵyp, basqa kásipkerlermen de yntymaqtastyq ornatýǵa múmkindik berdi.
«Bıznes mundaı kezdesýlerge muqtaj. Óıtkeni, bizde memlekettik qyzmetkerlerge qoıatyn suraqtar jıi bolady. Sondyqtan oblys basshylyǵynyń kásipkerlerge barlyq esikterdi ashýǵa degen umtylysyn tolyǵymen qoldaımyz», - dedi «Ertis Business Association» kásipkerler qaýymdastyǵynyń tóraǵasy Aslan Kýnııarov.
Іskerlik tańǵy asqa jınalǵandardyń aldynda Nur-Sultannan kelgen qonaqtar sóz sóıledi. Olardyń ishinde Qazaqstandyq ındýstrııa jáne eksport ortalyǵy basshysynyń orynbasary Turar Jolmaǵambetov boldy. Onyń aıtýynsha, búgingi kúni joǵary óńdelgen ónimder shyǵaratyn kásiporyndar eksportty ósirý úshin qoldaý taba alady. Óńirdegi qubyrlar men kabeldi óndirýshiler shet elderge ónim jetkizý úshin tasymaldaý shyǵyndaryna 200 mıllıon teńgege deıin ótemaqy ala alady.
«Kásipker veb-saıttarda nemese baspa betterinde kez kelgen qoldaý baǵdarlamalary týraly aqparat kórgende, ol adamda qosymsha suraqtar týyndaıdy. Sol sebepti, biz bıznesmendermen túrli máselelerdi talqylap alý úshin bundaı kezdesýlerdi quptaımyz. Betpe-bet kezdesý árqashan tıimdi bolyp keledi», - dedi ındýstrııa jáne eksport ortalyǵynyń ókili.
Bir shynyaıaq shaıdyń ústinde bıznesmender óz máseleleri týraly aıtyp berdi. Mysaly, «Fresh Milk» JShS basshysy Oleg Tolmachev óndiretin sút ónimderin shet elge jetkizýdi uıymdastyra almaı júrgendigin málim etti.
«Bizdiń kompanııa 2017 jyly Gonkongtaǵy halyqaralyq kórmege qatysty. 2018 jyly biz Londonǵa attandyq. Sodan keıin sheteldik kompanııalarmen birneshe kelisimshartqa qol qoıdyq. Búgin qaıda bolsyn habarlassaq ta, qujattarǵa baılanysty túrli kedergilerdiń kesirinen ónimderdi ózge elge jetkizýdi bastaı almaı otyrmyz. Syrtqy naryqqa shyǵý úshin bizge kómek qajet», - dep surady bıznesmen.
Barlyq qoıylǵan suraqtarǵa jaýap berýge jáne muqtaj kásipkerlerge barynsha qoldaý kórsetýge ýáde berildi. Sonymen qatar, Pavlodar oblysynyń ákimi úsh aıda bir ret bıznesmendermen iskerlik tańǵy asta kezdesýge sóz berdi.
