Ákimdikterge áleýmettik nysandardyń qurylys qarqynyn kúsheıtý týraly usynymdar joldandy
«Nurly jer» memlekettik baǵdarlamasy aıasynda elimizde qurylys salasyn qoldaýǵa baǵyttalǵan birqatar naqty shara qarastyrylǵan. Onyń ishinde ákimdikterge muqtaj azamattardy turǵyn úımen qamtamasyz etý úshin jeke qurylys salýshylardan daıyn turǵyn úı satyp alý múmkindigi berildi. Osy maqsatta bıyl 4 myńnan astam páter satyp alý úshin 35 mlrd teńge bólý josparlanǵan. Bul rette respýblıkalyq bıýdjetten qarajat shekteýler boıynsha bólinedi (1 sharshy metrge - 140-180 myń teńge). Ákimdikter turǵyn úılerdi satyp alý kezinde jergilikti bıýdjetten qosa qarjylandyra alady», - delingen QR IIDM málimetinde.
Qazir elimizdiń qurylys sektorynda tótenshe jaǵdaıdyń keri áserin jeńildetý jáne koronavırýstyq pandemııaǵa baılanysty turalaýǵa jol bermeý maqsatynda memleket barynsha qajetti sharalar qabyldaýda.
1. QR Prezıdenti janyndaǵy tótenshe jaǵdaı rejımin qamtamasyz etý jónindegi memlekettik komıssııanyń 2020 jylǵy 13 sáýirdegi sheshimimen qyzmetkerlerdiń jumys oryndarynda qashyqtyqty saqtaı otyryp, talap etiletin sanıtarlyq-epıdemıologııalyq sharalar saqtalǵan jaǵdaıda kásipkerlik sýbektileriniń jumysy kezeń-kezeńmen jandandyrylady.
2. Aǵymdaǵy jyldyń 20 sáýirinen bastap Nur-Sultan jáne Almaty qalalaryndaǵy ónerkásip jáne qurylys kásiporyndary, sondaı-aq qyzmet kórsetý salasynyń belgili bir sektorlary, onyń ishinde qurylys kompanııalary, asfalt jáne beton zaýyttary, kólemi 2 myń sharshy metrden asatyn iri qurylys dúkenderi jumystaryn qaıta jandandyrdy. Ózge óńirlerde de bul jumys jalǵasýda.
«Kásiporyndar men kásipkerlik sýbektileriniń tizbesin olardyń qyzmetkerleriniń naqty sanymen, jumys ýaqyty men jetkizý tásilderimen óńirlerdiń jedel shtabtary aıqyndaıdy. Sonymen qatar, Memleket basshysy 27 sáýirde málimdegendeı, dertke qatysty ahýal ýshyqpasa, tótenshe jaǵdaı rejımi 11 mamyrda aıaqtalýy tıis. Salynyp jatqan obektilerdi tapsyrý merziminiń buzylýyna jol bermeý maqsatynda, ákimdikterge qurylys-montaj jumystaryn júrgizý kestesin qaıta qaraý jáne karantındik sharalardy alyp tastaǵannan keıin, áleýmettik mańyzy bar obektilerdiń qurylys qarqynyn kúsheıtý qajettigi týraly usynymdar joldandy», - dep atalyp ótken vedomstvo málimetinde.
