Ákimdikterdiń órtke qarsy daıyndyǵy máz emes - Qalmuhanbet Qasymov
ASTANA. QazAqparat - Búgin Úkimet otyrysynda QR Іshki ister mınıstri Qalmuhanbet Qasymov óńirlerdiń órtke qarsy daıyndyqtaryna kóńili tolmaıtynyn jetkizdi, dep habarlaıdy QazAqparat.
«Shilde jáne tamyz aılarynda órt qaýipi artatyny belgili. Qazgıdromet málimetteri boıynsha, osy kezeńde aýa raıynyń ortasha temperatýrasy +30ºS quraıtyn bolady. Al batys pen soltústik oblystarda temperatýra +43ºS jetip, jaýyn-shashyn az túsedi dep boljanyp otyr. Sondyqtan bıyl jazda ormandarda órt qaýipi óte joǵary bolmaq», - dedi mınıstr Úkimet otyrysynda.
Onyń aıtýynsha, tabıǵı órtterge shuǵyl áreket etý maqsatynda bıyl barlyq oblystar (Qyzylorda jáne Mańǵystaý oblystarynan basqa) «Qazaqstan Ǵarysh Sapary» AQ-men ǵaryshtyq baqylaý júrgizý boıynsha jalpy somasy 40 mln teńgege kelisim jasasqan.
Sonymen qatar, shekaraaralyq baılanys aıasynda Reseı Tótenshe jaǵdaılar mınıstrliginiń jasaqtarymen birlesken oqý-jattyǵý ótkizildi. Onyń aıtýynsha, transshekaralyq órtterdi sóndirý jumystaryn júrgizý úshin órt-qutqarý qyzmetterin shekaradan kedergisiz ótkizý tártibi jasalýda.
Onyń ústine balalarǵa arnalǵan jazǵy lagerlerdegi órt qaýipsizdigine de úlken kóńil bólinetin bolady.
«Baqytjan Ábdiruly, búgingi tańda jalpy ákimdikterdiń, orman ıelereniń, orman kúzetiniń jáne ózge de sharýashylyq júrgizýshi sýbektilerdiń órt qaýipi maýsymyna daıyndyǵy jetkilikti deńgeıde qamtamasyz etilmegen», - dedi mınıstr Úkimet basshysy Baqytjan Saǵyntaevqa qaratyp aıtqan sózinde.
