Ákimdikter jylytý maýsymyna daıyndyqty kúsheıtýi qajet
Bul týraly búgin Úkimet otyrysynda QR Indýstrııa jáne ınfraqurylymdyq damý mınıstri Beıbit Atamqulov aıtty, dep habarlaıdy QazAqparat tilshisi.
«Jergilikti atqarýshy organdar 10 662 qazandyqty daıyndady, bul - 98,6 paıyz. Qalǵan 143 avtonomdy qazandyq boıynsha daıyndyq jumystary júrgizilip jatyr. Batys Qazaqstan oblysynda jumys qarqyny tómen ekeni baıqalady. Aǵymdaǵy kezeńge josparlanǵan 5038 shaqyrym jylý jelileriniń 5 024 shaqyrymy nemese 99,1 paıyzy jóndeldi»,- dedi mınıstr.
Beıbit Atamqulov jelilerdi daıyndaýda da Batys Qazaqstan oblysynyń daıyndyǵy tómen ekenin basa aıtty.
«Ákimdikter ınjenerlik ınfraqurylymdy, áleýmettik sala nysandaryn jáne turǵyn úılerdi jylytý maýsymyna ýaqtyly daıyndaýdy kúsheıtýi qajet, ásirese bul densaýlyq saqtaý jáne turǵyn úı nysandaryna qatysty», - dedi ol.
Mınıstrdiń aıtýynsha, jóndeýge josparlanǵan 14 213 shaqyrym sýmen jabdyqtaý jáne sý burý ınfraqurylymynyń 14 089 shaqyrymy nemese 99,1 paıyzy jóndeldi.
«Túrkistan jáne Batys Qazaqstan oblystarynda jumys qarqyny tómen», - dedi Beıbit Atamqulov.
