Ákimdikter utymdy bastamalarǵa barynsha qoldaý kórsetýi tıis – Toqaev

ASTANA. QazAqparat – Etnomádenı birlestikterdiń jergilikti bılikpen tikeleı qatynas ornatýy mańyzdy. Bul týraly Qazaqstan halqy Assambleıasynyń HHHІІ sessııasynda Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Assambleıanyń barlyq negizgi jumysy jergilikti jerde júrýi kerek. Óńirlik assambleıalar men jergilikti etnomádenı birlestikterge osy sessııada qoıylǵan mindetterdi iske asyrý ǵana emes, jalpy reformalardyń sáttiligi de baılanysty bolady», - dedi Prezıdent.

Memleket basshysy Assambleıa kóptegen ıgilikti iske uıytqy bolyp otyrǵanyna toqtaldy.

«Máselen, rekordshy Sergeı Tsyrýlnıkov «100 aýyl» jobasy boıynsha bastama kóterdi. Ol aýyldyq jerdegi 100 mektepti sportqa qajetti qural-jabdyqpen qamtamasyz etti. Munyń bárin bıýdjetten qarjy suramaı júzege asyrdy. «Úıde sóıle» atty jobanyń aıasynda aýla klýbtary ashylyp jatyr. Turǵyndar sol jerde bas qosyp, qazaq tilin úırene bastady. Ákimdikter osyndaı utymdy bastamalarǵa barynsha qoldaý kórsetýge tıis. Etnomádenı birlestikterdiń jergilikti bılikpen tikeleı qatynas ornatýy mańyzdy», - dedi Qasym-Jomart Toqaev.