Ákimdikter túrmeden shyqqan azamattardy qoǵam ómirine beıimdeýge jaýapty ekenderin bilmeıdi de - «Halyqaralyq túrme reformasy» uıymy
ASTANA. 17 qazan. QazAqparat - Búgin Astanada «Túrme júıesin áleýmettik jaǵynan reformalaý: jumyspen qamtý, reıntegratsııa jáne bilim berý» taqybyryndaǵy forým bastaldy. Atalǵan jıyn «Halyqaralyq túrme reformasy» (Penal Reform International) uıymynyń «Túrmeden shyqqan azamattardyń qaıta beıimdelýi» atty eki jyldyq jobanyń qorytyndysyna arnalyp otyr.
Uıymnyń aımaqtyq dırektory Sáýle Mektepbaeva atap kórsetkendeı, 2010 jyly túrmeden shyqqan azamattardy qaıta beıimdeý (resotsıalızatsııa) mindeti jergilikti bılik organdaryna júktelgen bolatyn. «Biz eki jyl boıy kóptegen ákimdiktermen jumys istep kórdik. Ókinishke qaraı, olardyń basym bóligi atalǵan mindetti atqarǵannan buryn ol týraly bilmeıdi de. Sebebi barlyǵy birdeı búgingi zańnamamen tanyspaǵan», - deıdi S.Mektepbaeva. Onyń aıtýynsha, qazirgi kezde uıym «Jumyspen qamtý» atty jańa jobany daıarlap jatyr. «Jalpy, bul máseleni memlekettiń bólek bir saıasaty retinde qalyptastyrý qajet. Óıtkeni ol Qazaqstannyń búgingi jumyspen qamtý júıesin aıtarlyqtaı kúsheıte alady», - dep atap kórsetti «Halyqaralyq túrme reformasy» uıymnyń aımaqtyq dırektory Sáýle Mektepbaeva.
