Ákimdikter turǵyn úı ınspektsııalaryn qurýdy jyldamdatýlary tıis - S. Nokın
ASTANA. Sáýirdiń 22-ci. QazAqparat /Qanat Mámetqazyuly/ - Turǵyn úı -kommýnaldyq sharýashylyq salasyndaǵy jumystardy damyta túsý úshin óńirlerdegi ákimdikter turǵyn úı ınspektsııalaryn qurýdy jyldamdatýlary tıis.
Búgin QR Parlamenti Májilisinde ótken dóńgelek ústel barysynda Qurylys isteri jáne turǵyn úı -kommýnaldyq sharýashylyǵy agenttiginiń tóraǵasy Serik Nokın osylaı málim etti, dep habarlaıdy QazAqparat.
Sóz arasynda Agenttik tóraǵasy byltyrǵy jyly turǵyn úı-kommýnaldyq saladaǵy máselelerdi retteýge baǵyttalǵan zań qabyldanǵanyn, qujatta basqa da normalarmen qosa az qamtylǵan azamattardy baspanamen qamtýdyń jańa tetigi qarastyrylǵanyn atap ótti. Osy normanyń tezirek júzege asýy úshin Úkimet tarapynan turǵyn úı kómegin berý týraly Ereje de bekitilgen. Osy Ereje negizinde máslıhattar ózderiniń óńirlik erejelerin de qosa bekitýleri tıis eken. «Alaıda, búgingi kúni bundaı ereje tek Almaty, Shyǵys Qazaqstan, Pavlodar jáne Ońtústik Qazaqstan oblystarynda ǵana júzege asyp otyr. Sonymen birge, zań boıynsha turǵyn úı ınspektsııalaryn qurý máselesi de qarastyrylǵan edi. Bundaı ınspektsııalar jalpy úı múlikterine qatysty jóndeý jumystarynyń shyǵystaryn, smetalyq qujattardy bekitip berýleri tıis bolatyn. Onsyz eshqandaı da jumystar alǵa jyljymaıtyny anyq. Alaıda, áli kúnge deıin elimizdiń birqatar óńirlerinde bundaı ınspektsııalar qurylǵan joq. Sondyqtan da, óńir ákimdikteri turǵyn úı-kommýnaldyq sharýashylyqqa qatysty jańa erejelerdi bekitýdi jáne turǵyn úı ınspektsııalaryn qurýdy jyldamdatýlary qajet dep esepteımiz», dedi S. Nokın.
