Ákimdikter sý qoımalaryn qalpyna keltirý jumystaryn kúsheıtýi kerek – Úkimet basshysy
«Sý resýrstaryn tıimdi paıdalaný máselesine kóp kóńil bólý qajet. Aýyl sharýashylyǵyna arnalǵan sý kóleminiń tek 60 paıyzy ǵana egistikke jetedi. Qalǵany eskirgen ınfraqurylymnyń kesirinen ysyrap bolady. Ekologııa mınıstrligi men ákimdikter kanaldar men sý qoımalaryn jóndeý jáne qalpyna keltirý jumystaryn kúsheıtýi kerek», - dedi Á. Smaıylov.
Onyń aıtýynsha, Aýyl sharýashylyǵy mınıstrligi Ekologııa mınıstrligimen birlesip, sýarmaly jerlerde sý únemdeý tehnologııalaryn engizýdi yntalandyrý jáne sýdy tsıfrlyq esepke alýdy keńeıtý tetikterin ázirleýi tıis.
«Sýdy kóp qajet etetin daqyldardy ósirý úshin jańbyrlatyp jáne tamshylatyp sýarý jabdyqtaryn qoldaný tájirıbesin keńeıtý qajet. Sondaı-aq, kollektorlyq-drenajdyq júıeler arqyly sýdy qaıta paıdalaný tehnologııalaryn kóbirek qoldaný kerek. Jalpy, óńirlerdi tıisti sý kólemimen qamtamasyz etý úshin sýmen jabdyqtaýshy uıymdardyń jumysyn úılestirý qajet», - dedi Premer-Mınıstr.
