Ákimdikter saılaýda COVID-19-ǵa qarsy tıisti sharalar qabyldaýy tıis - Berik Imashev

NUR-SULTAN. QazAqparat – Búgin QR Ortalyq saılaý komıssııasynyń otyrysynda 10 qańtarǵa taǵaıyndalǵan Parlamenti Májilisiniń jáne máslıhattarynyń depýtattaryn saılaý naýqany kezeńinde saılaý ýchaskelerin materıaldyq-tehnıkalyq jaraqtandyrý, sanıtarlyq qaýipsizdik sharalaryn qamtamasyz etý taqyryby qaraldy, dep habarlaıdy QazAqparat tilshisi.

OSK tóraǵasy Berik Imashev Memleket basshysynyń 2020 jylǵy 21 qazandaǵy Jarlyǵyna sáıkes jergilikti atqarýshy organdar kezekti saılaýdy materıaldyq-tehnıkalyq qamtamasyz etý boıynsha qajetti sharalar qabyldaýy tıis ekenin atap ótti. Budan basqa, ákimdikter daýys berýdi uıymdastyrý jáne ótkizý kezinde COVID-19 koronavırýstyq ınfektsııasynyń taralýynyń aldyn alý boıynsha tıisti sharalar qabyldaýy tıis.

Búgingi otyrys barysynda jergilikti atqarýshy organdardyń ókilderi tyńdaldy. Olar saılaý ýchaskelerin materıaldyq-tehnıkalyq jaraqtandyrý, sanıtarlyq qaýipsizdik sharalaryn qamtamasyz etý, múmkindigi shekteýli adamdardyń saılaý quqyqtaryn qamtamasyz etý boıynsha júrgizilgen jumystar týraly baıandady.

Otyrysty qorytyndylaı kele, Berik Imashev daýys berý kúnin uıymdastyrý boıynsha jergilikti atqarýshy organdardyń quzyretine jatatyn barlyq máseleler mindetti túrde sheshilýi tıis ekenin aıtty.

Budan buryn habarlanǵandaı, búgin OSK otyrysynda 2021 jylǵy 10 qańtarǵa taǵaıyndalǵan QR Parlamenti Májilisiniń jáne máslıhattarynyń depýtattaryn saılaý jónindegi naýqan barysynda OSK-ǵa kelip túsken jeke jáne zańdy tulǵalardyń ótinishterin qaraý barysy talqylandy.