Ákimdikter oqýlyqtardy óz kúshimen tası bastady
ASTANA. QazAqparat - "Oqýlyq" respýblıkalyq ǵylymı-praktıkalyq ortalyǵy mektepterge oqýlyqtardy jetkizý máselesin jiti baqylap keledi, dep xabarlaıdy QazAqparat tilshisi.
Ortalyq dırektorynyń orynbasary Ádilxan Dúısebektiń aıtýynsha, oqýlyqtardy ýaqytynda jetkizý máselesi kóterilgennen keıin osy saladaǵy jumys jyldam júre bastady. Jetkizý kompanııalarmen kelisimsharttar jasaldy. Al keıbir ákimdikter oqýlyqtardy óz kúshimen tası bastady. "Úkimette Astana qalasy, Batys Qazaqstan oblysynyń Zelenov aýdany men Túrkistan oblysynyń birneshe aýdany týraly aıtyldy. Qazirgi kezde Astana qalasy jetkizýshi kompanııamen kelisimshartty jasady. Sosyn biraz oblystar oqýlyqtardy óz kúshimen tasyp jatyr. Jańylmasam, baspalar oqýlyqtardyń 51,3 protsentin jiberdi. Kitaptardyń 45,5 protsenti óńirlerge jetti. Jalpy, jergilikti atqarýshy organdar 20 tamyzǵa deıin oqýlyqtardyń bárin aldyrtamyz dep sóz berip otyr. Sóıtip, mektepterge taratady. Sondyqtan bıyl oqýlyqtardyń tapshylyǵy bolmaýy tıis. Kúnde monıtorıng jasalyp otyrady", - dedi Á.Dúısebek QazAqparat tilshisine bergen suxbatynda.
Aıta keteıik, Úkimettiń ótken aptadaǵy otyrysynda QR Bilim jáne ǵylym mınıstri Erlan Saǵadıev oqýlyqtardy jetkizý máselesin kótergen bolatyn. "Negizi, oqýlyqtardy jetkizý - ákimdikterdiń jaýapkershiligine jatatyn másele. Jalpy, oblystar kitaptardy jetkizý boıynsha kólik kompanııalarymen kelisimsharttardy rásimdedi. Birneshe óńirler, onyń ishinde Astana qalasy, Batys Qazaqstan oblysynyń Zelenov aýdany, Túrkistan oblysynyń tórt aýdany osy kúnge deıin bul jumysty bastaǵan joq. Jańa oqý jylyna deıin 20 kún qaldy. Sondyqtan atalǵan jerlerge oqýlyqtardy ýaqytynda jetkizbeý qaýpi bar. Jergilikti atqarýshy organdardyń barlyǵynan osy máselege nazar aýdarýdy suraımyn", - dedi E.Saǵadıev.
