Ákimdikter muqtaj oqýshyǵa beriletin kómek kólemin ulǵaıta alady, biraq azaıtýǵa quqyǵy joq – mınıstrlik

NUR-SULTAN. QazAqparat – «Jalpyǵa mindetti bilim berý» qory arqyly muqtaj oqýshyǵa keminde 37 389 teńge kóleminde kómek beriledi. Ákimdikter onyń kólemin ulǵaıta alady, biraq azaıtýǵa quqyǵy joq. Bul týraly Oqý-aǵartý mınıstrligi Balalardyń quqyqtaryn qorǵaý komıteti málim etti, dep habarlaıdy QazAqparat.

«Buǵan deıin BAQ-ta Jambyl oblysyndaǵy keıbir kóp balaly ata-analardyń aıtýynsha, mektep formasy men kantstaýarlar satyp alýǵa jergilikti atqarýshy organdar 32 500 teńge jáne tek qana bir balaǵa bóletini týraly aqparat jarııalandy.

Osyǵan oraı, QR Oqý-aǵartý mınıstrligi Balalardyń quqyqtaryn qorǵaý komıteti qoldanystaǵy zańnamaǵa sáıkes, áleýmettik osal otbasylar «Jalpyǵa mindetti bilim berý» qory arqyly úıdegi ár oqýshyǵa kómek ala alatynyn habarlaıdy. Sonymen birge, kómek kólemi ár muqtaj oqýshy úshin keminde 37 389 teńge bolýy tıis. Jergilikti atqarýshy organdar kórsetilgen kómek kólemin ulǵaıta alady, biraq ony azaıtýǵa quqyǵy joq.

Mektepterdi qarjylandyrý, sonymen qatar oqýshylarǵa qoldaý bildirýdi ákimdikter júzege asyrady. Bıyl barlyq muqtaj balalarǵa, ıaǵnı 440 myńnan astam balanyń árqaısysyna keminde 37 389 teńge kóleminde kómek kórsetiledi», - dep jazylǵan Komıtet habarlamasynda.