Ákimdikter beı-bereket qoqys úıindilerin tolyq joıýy kerek – Ekologııa mınıstri

NUR-SULTAN. QazAqparat – QR Ekologııa, geologııa jáne tabıǵı resýrstar mınıstri Serikqalı Brekeshev eldegi ekologııalyq jaǵdaıdy jaqsartý úshin birqatar usynys aıtty, dep habarlaıdy QazAqparat tilshisi.

«Qurmetti Asqar Uzaqbaıuly, joǵaryda baıandalǵannyń negizinde, ekologııalyq jaǵdaıdy jaqsartý maqsatynda kelesi sharalardy qabyldaý qajet. Birinshi, múddeli memlekettik organdar men ákimdikter «Jasyl Qazaqstan» ulttyq jobasynyń sharalary men kórsetkishterin jáne óńirlerdegi ekologııalyq ahýaldy jaqsartý jónindegi Jol kartalaryn ýaqytyly iske asyrýdy qamtamasyz etý kerek», - dep atap ótti S. Brekeshev Úkimet otyrysynda.

Ekinshiden, ákimdikter beı-bereket qoqys úıindilerin tolyǵymen joıýdy qamtamasyz etýi tıis. Polıgondardy ekologııalyq jáne sanıtarlyq normalarǵa sáıkes keltirip, qoǵamdyq kólikti gazǵa jáne/nemese elektr kóligine aýystyrý jónindegi jumysty jalǵastyrýy kerek.

«Úshinshiden, Energetıka mınıstrligi ákimdiktermen birlesip, anaýǵurlym lastanǵan 10 qalada jeke sektor men sharýashylyq júrgizýshi sýbektilerdi gazǵa nemese balamaly energııa kózderine qosý máselesin pysyqtaýy kerek. Ári qaraı tıisti memlekettik organdar avtokólikterge tehnıkalyq baıqaý júrgizýdi kúsheıtsin jáne janar-jaǵarmaı materıaldar sapasyna baqylaýdy qamtamasyz etsin», - dedi Ekologııa mınıstri.

Buǵan deıin Serikqalı Brekeshev Qazaqstannyń 6 qalasynda qoqys jaǵatyn zaýyttar salynatynyn aıtqan edi. Jyl basynan beri 7,3 myń úıindiniń 86 paıyzy joıyldy. 17 myńǵa jýyq quqyqbuzýshy jaýapkershilikke tartylyp, 25 mln teńge somasyna aıyppul salynǵan.

Sonymen birge elimizdegi 3 myńnan astam qoqys polıgonynyń 20% ǵana normaǵa saı ekeni anyqtaldy.