Ákimdikter balyq ósirýdi damytýǵa bıýdjetten qarajat bólýi tıis
«Balyq sharýashylyǵyn damytý salasynda negizgi mindet sý aıdyndarynyń bıologııalyq ártúrliliginiń azaıyp ketýine jol bermeý bolyp tabylady. Aýlaýǵa bólingen kvotalardyń shamamen 30 paıyzǵa kem ıgerilýi balyqtar sanynyń azaıyp, olardyń túrlik sanalýandyǵynyń qysqaryp, baǵaly túrler tartymdylyǵy tómen túrlermen aýystyrylyp jatqanyn kórsetedi»,- dedi ol.
Onyń aıtýynsha, balyq alý kólemi balyqtandyrý kólemimen ótelip otyrǵan joq. Máselen, 2016 jyly aýlaý kólemi 44 myń tonnadan astam mólsherde bolsa, sýǵa jiberilgen shabaqtar sany 277,5 mln danany qurady. Al balyq shabaqtarynyń ómirsheńdigi ortasha eseppen 5 paıyz bolǵandyqtan balyq ósimi ortasha eseppen alǵanda 27 myń tonna nemese 60 paıyz degen sóz. Osyǵan baılanysty paıdalanýshylardy balyq aýlaýǵa bólingen kvotalarǵa barabar mólsherde balyqtandyrýdy júzege asyrýǵa mindetteıtin norma engizý usynylyp otyr.
Mańyzdy ekologııalyq problemalardyń biri bekire balyqtarynyń túrlerin saqtaý bolyp tabylady. Osyǵan baılanysty Erlan Nysanbaevtyń atap ótýinshe, birqatar shara qabyldanǵan. Atap aıtqanda, 2010 jyldan bastap bekire balyqtaryn kásipshilik maqsatta aýlaýǵa tyıym salyndy. Al bıyl bekire balyqtaryn ǵylymı maqsatta aýlaýǵa da tyıym salý sharasy engizildi. Sóıtip bekire balyqtaryn ǵylymı maqsatta aýlaýǵa alǵan ruqsatty jeleý etip, bekire balyqtaryn aýlaý múmkindigi joıyldy. Bekire balyqtarynyń túrleri qosymsha aýlanǵan jaǵdaıda olardy sýǵa jiberýge mindetteıtin norma zańnamalyq turǵyda engizildi. Brakonerlerdiń negizgi balyq aýlaý quraly bolyp tabylatyn «qytaılyq aýlardy» satýǵa bıyl zańdy túrde tyıym salý engizildi.
«2017 jylǵy 9 maýsymda Balyq sharýashylyǵynyń ónimdiligi men ónim sapasyn arttyrýdy sýbsıdııalaý qaǵıdalary bekitildi. Osyǵan baılanysty oblystar ákimdikteri aldaǵy jyly taýarly balyq ósirýdi damytýdy qoldaýǵa jergilikti bıýdjetten qarajat bólinýin eskerýi qajet», - dedi vıtse-mınıstr.