Ákimdikter aýa sapasy nasharlaǵanda kólikter men kásiporyndarǵa shekteý engize alady – Jańa ekologııalyq kodeks
«Kóliktiń aýany lastaý máselesin sheshý úshin elektr qozǵaltqyshy bar kólik quraldaryn paıdalanýdy ilgeriletý jumystar júrýde. Ol úshin bıyl maýsym aıynda ýtılızatsııalyq alymǵa «nóldik» stavka engizdik. Sondaı-aq, «Óndirýshiniń keńeıtilgen jaýapkershiligi» operatorymen tıisti ınfraqurylymdy qurý maqsatynda elektr kólikterin zarıadtaý stantsııalaryn damytý týraly pılottyq joba iske asyryla bastady. Nur-Sultan jáne Almaty qalalarynda júzden astam zarıadtaý stantsııalary jumys isteıdi», - dedi Maǵzum Myrzaǵalıev búgingi Úkimet otyrysynda.
Mınıstrdiń aıtýynsha, bıyl uzyndyǵy 3 myń shaqyrym iri qalaaralyq trassalarda 46 jańa elektr kólikterin zarıadtaý stantsııasyn ornatý josparlanǵan.
«Jańa Ekologııa kodeksinde jergilikti atqarýshy organdardyń qorshaǵan orta máselelerindegi ókilettikterin edáýir kúsheıtý jáne keńeıtý kózdelgen. Kodeks kúshine engen soń ákimdikter árbir 5 jyl saıyn qorshaǵan orta sapasynyń nysanaly kórsetkishterin jáne ony jaqsartý jónindegi sharalardy bekitýge tıis. Odan bólek, ákimdikterge aýa sapasy nasharlaǵan kezde kólik quraldarynyń kirýine shekteý engizý quzyreti berildi. Sondaı-aq qolaısyz meteorologııalyq jaǵdaılarda, mysaly, jelsiz jaǵdaıda, ákimdikter lastaýshy kásiporyndardyń qyzmetine ýaqytsha shekteýler engize alady», - dep túsindirdi M. Myrzaǵalıev.
