Ákimdikter áleýmettik turǵyn úı men ınfraqurylym salýda 730 jobany iske asyrady

NUR-SULTAN. QazAqparat – Bıyl «Nurly jer» baǵdarlamasy aıasynda barlyq qarjylandyrý kózderi esebinen 14 mln sharshy metrden astam jańa turǵyn úı salý josparlanǵan. Bul týraly QR Indýstrııa jáne ınfraqurylymdyq damý mınıstrliginen málim boldy, dep habarlaıdy QazAqparat.

«Ákimdikter memlekettik ınvestıtsııalar esebinen 269 mlrd teńgege áleýmettik turǵyn úı jáne turǵyn úı qurylysy aýdandaryna ınfraqurylym salý boıynsha 730 jobany iske asyrady», - delingen mınıstrlik habarlamasynda.

Sonymen qatar, «Nurly jer» baǵdarlamasy aıasynda jer ýchaskesi jáne bekitilgen jobalyq-smetalyq qujattamasy, aıaqtalmaǵan obektileri bar ákimdikter men jeke qurylys salýshylar kezekte turǵandar úshin kredıttik turǵyn úı jobalaryn iske asyrýda memlekettik-jekeshelik áriptestik tetigin paıdalanýda.

Budan buryn habarlanǵandaı , salynyp jatqan obektilerdi tapsyrý merziminiń buzylýyna jol bermeý maqsatynda, ákimdikterge qurylys-montaj jumystaryn júrgizý kestesin qaıta qaraý jáne karantındik sharalardy alyp tastaǵannan keıin, áleýmettik mańyzy bar obektilerdiń qurylys qarqynyn kúsheıtý qajettigi týraly usynymdar joldandy.