Ákimdikter adam kapıtalyn damytýdy qamtamasyz etýi tıis – Álıhan Smaıylov

ASTANA. QazAqparat – Úkimet basshysy Álıhan Smaıylov otandyq IT salasyn ilgeriletýge qatysty birneshe mınıstrlikke mindet júktedi, dep habarlaıdy QazAqparat tilshisi.

«Tsıfrlandyrý mınıstrligi ákimdiktermen birlesip, Almaty jáne Qaraǵandy oblystarynyń tájirıbesi negizinde ár óńirde IT-hab qurýy qajet. Ákimdikter adam kapıtalyn damytýdy qamtamasyz etýi tıis. Ol úshin programmısterdi, dızaınerlerdi, ınjenerler men osy salanyń ózge de mamandaryn daıarlaý jáne qaıta daıarlaý úshin IT-mektepter qurý qajet. Ǵylym jáne joǵary bilim mınıstrligi IT-mamandaryn oqytý baǵdarlamasyn álemdik trendterge saı barynsha ıkemdi etip jasaýy tıis. Stýdenttermen tájirıbe almasý úshin jetekshi ýnıversıtettermen taǵylymdamadan ótý baǵdarlamalaryn jolǵa qoıý kerek», - dedi Álıhan Smaıylov Úkimet otyrysynda.

Premer-Mınıstrdiń málimdeýinshe, álemdik tájirıbeni eskere otyryp, venchýrlik qarjylandyrýdy qamtamasyz etý úshin zańnamaǵa tıisti túzetýler engizý qajet.

«Tsıfrlyq damý, ınnovatsııalar jáne aeroǵarysh ónerkásibi mınıstrligi, Ǵylym jáne joǵary bilim mınıstrligi, Energetıka mınıstrlikterimen birlesip, jer qoınaýyn paıdalanýshylardyń ǵylymı-zertteý jáne tájirıbelik-konstrýktorlyq jumystarǵa bólinetin qarajaty esebinen startap jobalardy qarjylandyrý tásilderin qaraýy tıis», - deıdi ol.

Osyǵan deıin Úkimet basshysy ár óńirde IT mektepter bolýy tıis ekendigin aıtty.