Ákimdikter 2023 jylǵy 1 maýsymǵa deıin stıhııalyq polıgondardy joıýy tıis - Úkimet
Otyrysta kommýnaldyq qaldyqtardy basqarý tıimdiligin arttyrý jáne turǵyn úı sektorynda, ónerkásip pen basqa da salalarda energııa únemdeý tehnologııalaryn engizý jónindegi josparlar qaraldy.
Bıylǵy jyldyń úshinshi toqsanynda respýblıka boıynsha qatty turmystyq qaldyqtardy qaıta óńdeý úlesi 24% boldy. Bul kórsetkish jyl saıyn artyp keledi (2020 – 18%, 2021 – 21%) jáne 2025 jylǵa qaraı 30%-dan asýy kerek.
Búginde elimizde 3 005 QTQ polıgony jumys isteıdi, budan bólek Abaı, Aqmola, Aqtóbe, Atyraý, Shyǵys Qazaqstan, Batys Qazaqstan jáne Pavlodar oblystarynda taǵy 20 polıgon salý josparlanyp otyr. Ártúrli kezeńderde qoqysty bólip jınaý 142, al suryptaý 101 eldi mekende engizildi.
Premer-Mınıstr qoldanystaǵy polıgondardyń ishinde tek 630-ǵa jýyǵy ǵana (21%) ekologııalyq jáne sanıtarlyq normalarǵa saı ekenin atap ótti. Sondaı-aq, Úkimet basshysy jylyna 4-4,5 mln tonna turmystyq qaldyqtar jınalatynyn, alaıda jergilikti atqarýshy organdar qoqys jınaý jumysyn tıisti deńgeıde uıymdastyra almaı otyrǵanyn aıtty.
«Bul úrdis stıhııalyq polıgondardyń paıda bolýyna alyp keledi, olardy joıý úshin bıýdjet qarajaty jumsalady. Atap aıtqanda, qurylys qaldyqtaryn qaıta óńdeýge arnalǵan ınfraqurylym Qostanaı oblysy men elordada ǵana uıymdastyrylǵan. Qalǵan aımaqtarda ondaı ınfraqurylym joq», - dedi Álıhan Smaıylov.
Premer-Mınıstr ákimdikterge 2023 jylǵy 1 maýsymǵa deıin barlyq ruqsat etilmegen polıgondardy joıýdy jáne jalpy polıgondardy ekologııalyq jáne sanıtarlyq normalarǵa sáıkestendirý jumystaryn jedeldetýdi tapsyrdy.
Foto: t.me/KZgovernment
