«Ákimdikten úı, azyq-túlik surap júretinbiz»: Almaty oblysynda analar kásip bastady
Máselen, Taldyqorǵanda «Asyl analar» qoǵamdyq qory quryldy. Ol jerde kópbalaly jáne múgedek balalary bar analar tigin tsehyn ashyp, óz isterimen aınalysyp jatyr. Ómirlerin 100 paıyzǵa ózgertip jatqan bul jandar barlyǵyna úkimettik emes uıym arqyly qol jetkizgenin aıtýda.
«Ákimdikke baryp, bizge úı kerek, azyq-túlik kerek dep surap júretinbiz. Sodan keıin túsindik, qashanǵa deıin bireýge qol jaıyp, kómek suraımyz. Sol sebepti Amandyq Ǵabbasulyna óz tigin tsehymyzdy ashyp, jumys istesek degen usynysymyzdy bildirdik. Bizdi qoldap, osyndaı tigin tsehyn ashyp berdi. Qazir sol jerde 23 ana jumys isteıdi. Úkimettik emes uıym ashyp, qural-jabdyqtardy lızıngke alyp berdi. Qazir túrli zattardy tigýge tapsyrys alyp, jumysymyzdy istep jatyrmyz», - dedi úkimettik emes uıymdar arasynda ótken baıqaýdyń jeńimpazy Áıgerim Jolamanova.
Búginde jaqsy nátıje kórsetip úlgergen «Asyl analar» tigin tsehy úkimettik emes uıymdardyń ishinde úzdik joba dep tanyldy. «Qoǵam men memlekettiń ornyqty damý múddesindegi áriptestiginiń 30 jyly» atty forýmda ózge de úkimettik emes uıymdar marapattaldy.
«Almaty oblysy boıynsha 920 memlekettik emes uıym bar. Biraq sonyń bári belsendi jumys istep jatyr dep aıta almaımyz. Degenmen, 500-den artyǵy Táýelsizdiktiń alǵashqy jyldarynan bastap, ózderiniń órisin keńeıtip, jumystarymen tanylyp jatyr», - dedi Almaty oblystyq Іshki saıasat basqarmasynyń basshysy Rahmet Esdáýletov.
Úkimettik emes uıymdarǵa Almaty oblysynda qoldaý kóp. Máselen, bıyl memlekettik áleýmettik tapsyrys úshin 350 mıllıon teńgege jýyq qarjy bólingen. Odan bólek túrli granttarǵa da qarjy beriledi. Úkimettik emes uıym jaıly beıhabar jandar úshin arnaıy ǵımarat salynyp, ol jerde baǵyt-baǵdar beretin mamandar da otyr.
