Ákimdikke sózi ótpegen eki aıaǵy sal qarııa óz qolymen jıektasty shaǵyp, múgedekarba ótetin jol ashyp aldy - VIDEO
ASTANA. QazAqparat - Reseıdiń Krasnoıarsk qalasynda eki aıaǵynan sal bolyp qalǵan zeınetker birneshe saǵat tizerlep otyryp, jol shetindegi jıektasty balǵamen shaǵyp, arba ótetin jol jasap shyqty. Zeınetkerdiń aıtýynsha, ol 2013 jyldan beri qalalyq ákimdikten aýrýhanaǵa kirer jerde pandýs ornatyp berýlerin surap kelgen. Alaıda esh jaýap bolmaǵan, dep habarlandy Krasnoıarsk telekompanııasynyń saıtynda.
Qarııanyń esimi - Vladımır Jýrat. Ol 20 jyldan beri arbaǵa tańylǵan. Qos aıaǵy jáne oń qolynyń bir bóliginen jan ketken zeınetker kúnara shahardyń Totmına kóshesindegi aýrýhanaǵa kelip turýy kerek. Biraq, ár kelgen saıyn jol shetindegi bıik qoıylǵan jıektas oǵan bóget bolǵan da turǵan.
«Osy kóshemen júrý múmkin emes. Esh jerde pandýs joq. Bulaı bola ma? Bul degen bizdi, múmkindigi shekteýli jandardy, mazaq etý ǵoı», - deıdi Vladımır Jýrat.
