Ákimdikke kóligimen «kirgen» aqtóbelik birneshe mıllıon teńge aıyppul tóleıdi
AQTÓBE. QazAqparat - Aqtóbelik kásipker Baýyrjan Anapın ákimdikke kóligimen «kirgeni» úshin aıyppul tóleıdi, dep habarlaıdy QazAqparat tilshisi.
Oblys ákimdigi isteriniń basqarmasy men Aqtóbe oblysy ákiminiń apparaty qalalyq sotqa azamattyq shaǵym túsirdi. Іs materıalyna súıensek, 2018 jyly 12 mamyrda saǵat 12:10-da aqtóbelik «Nissan Patrol» kóligimen ákimdikke kirip bardy. Sol kezde qyzmettik kólikti de zaqymdaǵan. Aqtóbe oblystyq mamandandyrylǵan aýdanaralyq sotynyń sheshimimen B.Anapın Ákimshilik quqyqbuzýshylyq kodeksiniń 608-baby boıynsha aıypty dep tanylyp, 5 jylǵa kólik júrgizý quqyǵynan aıyryldy.
Al ákimdik zaqymdalǵan kólik shyǵynyn 757 myń teńge, al kire beris esiktiń shyǵynyn 2 mıllıon 505 myń teńgege baǵalady. Azamattyq aryzdy qaraǵan Aqtóbe qalalyq soty Baýyrjan Anapınnen 3 262 981 teńge óndirýge sheshim shyǵardy.
Eske salsaq, 2018 jyldyń mamyr aıynda aqtóbelik ákimdikke kóligimen «kirip» ketti. Onyń mas kúıinde kólik júrgizgeni belgili boldy. Ákimshilik quqyqbuzýshylyq kodeksiniń «Usaq buzaqylyq» baby boıynsha aıyptalyp, 10 kúnge qamaldy.
