Ákimdikke qarasty komıssııalardyń quramyn ózgertý kerek - Bolat Palymbetov
NUR-SULTAN. QazAqparat - Kásipkerlerdiń quqyqtaryn qorǵaý jónindegi ýákil Bolat Palymbetov memlekettik-jekeshelik áriptestiktiń negizgi máselesin atady, dep habarlaıdy QazAqparat tilshisi.
«Mysaly, memlekettik-jekeshelik áriptestik deımiz. Biraq osy salada konkýrs ótkizetin komısııalardyń quramynda kileń sheneýnikter otyr.
«Memlekettik-jekeshelik áriptestik» desek, sheneýnikter men kásipkerlerdiń sany teń bolýy kerek qoı. Búginde bárin ákimniń orynbasary sheshedi. Árıne, ondaıda kásipker para berýge asyǵady. Al komıssııanyń quramynda bıznestiń múddesin qorǵaıtyn adamdar otyrsa, kásipker konkýrstyń ádil ótetinine senedi. Osyny jasaýǵa bolady ǵoı», - dedi B.Palymbetov «Atameken» UKP kásipkerlerdiń quqyqtaryn qorǵaý jónindegi keńestiń búgingi otyrysynda.
Onyń aıtýynsha, jergilikti atqarýshy organdar statıstıka úshin memlekettik-jekeshelik áriptestik jobalaryn úıe beredi. Al bıýdjette tıisti qarjy qarastyrmaıdy. Sóıtip, esep bergende nysandardyń sanyn aıtady da, oǵan qansha qarjynyń bólingenin kórsetpeıdi. Qarjy bolmaǵan soń qaryz jınala beredi. Qazirdiń ózinde biraz kásipkerlerdiń shyǵyndary ótelmeı jatyr.
«Biz 2006 jyldan beri memlekettik-jekeshelik áriptestik týraly aıtyp kelemiz. Ataýy da jaqsy. Biraq osy salada áli kúnge deıin sheshilmeı jatqan máseleler barshylyq. Negizi, eki problemany sheshsek, bári óz ornyna keledi. Birinshiden, ashyqtyq. Ekinshiden, qarjylandyrý. Osy eki máseleni sheshsek, kóp nárseni rettep alýǵa bolady», - dep atap kórsetti B.Palymbetov.
Aıta keteıik, búgingi otyrysta keńes tóraǵasy Qaıyrbek Súleımenov osy saladaǵy ákimdikterdiń qıturqy áreketin ashyp berdi. Jergilikti bılik organdary óz basymdyǵyn paıdalanyp, qosymsha jeńildikterdi shyǵaryp alady. Sodan memlekettik-jekemenshik áriptestiktiń tepe-teńdigi buzylady. Óıtkeni kásipkerlerge artyq shyǵyn shyǵarýǵa týra keledi. Tipti, birlesip jasaǵan jobany tartyp alý faktileri de bar.
«Mysaly, men Pavlodardan kelgen bir kásipkerdi qabyldadym. Ol memlekettik-jekeshelik áriptestik negizinde mektep salyp shyqty. Іshinde sport zal da bar. Tabysty jumys istep jatqan mektep deıdi. Aqyry ol mektebin tartyp aldy. Endi, zańdy túrde alyp qoıdy ma, ony áli zerdelep shyǵý kerek. Ol kásipker zańdy buzǵan shyǵar. Degenmen, kásipker bárin óz aqshasyna saldy, mektepti qurdy, artynan sonyń bárin alyp qoıǵan durys emes qoı», - dedi Q.Súleımenov.
Al QR Memlekettik qyzmet isteri jáne sybaılas jemqolyqqa qarsy is-qımyl agenttigi tóraǵasynyń orynbasary Oljas Bektenovtyń sózine qaraǵanda, sheneýnikter barlyq jumysty op-ońaı qaǵazbastylyqqa aınaldyryp jiberedi. Sóıtip, kásipkerdiń ınvestıtsııalyq shyǵyndary da, operatsııalyq shyǵyndary da ótelmeı qalýy múmkin. Oǵan qosa, memlekettik-jekeshelik áriptestik konkýrstary áli kúnge deıin qaǵaz júzinde ótkiziledi. «Men bul máseleni jaqsy bilemin. Óıtkeni oblys ákiminiń orynbasary bolǵanda memlekettik-jekeshelik áriptestik máselelerimen aınalystym. Shyny kerek, sheshilmeı jatqan problemalar barshylyq. Máselen, búginde memlekettik satyp alýlar tolyǵymen elektrondy túrde júrgizilse, memlekettik-jekeshelik áriptestik konkýrstary áli kúnge deıin qaǵaz júzinde atqarylady. Konvertti skotchpen orap ákeledi de, komıssııa músheleriniń talqysyna salady. Eshqandaı tártip joq. Al tártip joq jerde sybaılas jemqorlyqtyq qaýipi joǵary. Kásipker mańyzdy bir jobany iske asyramyn dese de, sheneýnik ony ary-beri júgirtip, barlyq josparyn jermen jeksen etýi múmkin. Sebebi bıznesmen onyń tanysy da emes, týysy da emes», - deıdi O.Bektenov.
