Ákimdikke kandıdattar saılaý aldyndaǵy úgit naýqanyna kiristi - OSK

ASTANA. 25 shilde. QazAqparat - Qazirgi ýaqytta ákimdikke saılaýǵa túsýi úshin tirkelgen barlyq kandıdattar saılaý aldyndaǵy úgit naýqanyna kirisýge quqyly. Bul týraly búgin Ortalyq saılaý komıssııasynda ótken brıfıngte vedomstvonyń baspasóz hatshysy Venera Jeksembekova málim etti.

OSK ókiliniń aıtýynsha, kandıdattar naýqan barysynda tańdaýshylarmen jınalystar, kezdesýler ótkizýge, sondaı-aq, baspa jáne ózge de úgit materıaldaryn shyǵaryp, taratýǵa quqyly. «Árbir kandıdat ózine saılaý naýqanyn jáne saılaý aldyndaǵy úgitti júrgizýge kómektesetin senim bildirgen adamdarynyń bolýyna quqyly. Olardyń sany 5-eýden aspaýy kerek. Sonymen qatar, máslıhat depýtattary, saılaý komıssııasynyń músheleri nemese saıası memlekettik qyzmetshiler bolyp tabylmaıtyn Qazaqstan azamaty kandıdattardyń senim bildirgen ókili bola alady. Bundaı senim bildirilgen adamdar aýdandyq nemese qalalyq saılaý komıssııalarynda tirkelýi jáne tıisti kýálikterin alýy tıis», - deıdi V. Jeksembekov.

Sonymen qatar, kandıdattarǵa bıýdjetten bólinetin qarajattan basqa, olardyń árqaısysy úgit naýqanyna qatysty belgilengen tártippen qurylatyn óz saılaý qoryn quryp, sonyń qarajatyn paıdalanýǵa quqyly bolady. Al kandıdattardyń saılaý qorynyń mólsheri 1 mln. 399 myń 500 teńgeden aspaýy kerek.