Ákimdik jas dárigerlerdi qoldaýy tıis - Eljan Birtanov
QOSTANAI. QazAqparat - Qostanaı oblysyna Úkimet delegatsııasy quramynda bolǵan QR Densaýlyq saqtaý mınıstri Eljan Birtanov Qostanaı qalasynyń №4 emhanasynyń ujymymen kezdesti, dep habarlaıdy QazAqparat.
El astanasynan kelgen meımandy qarsy alǵan emhananyń bas dárigeri Margarıta Bısenova ótken jyldyń basty kórsetkishteri týraly málimet berdi.
«Emhana Qostanaıdyń ońtústik bóliginiń turǵyndaryna qyzmet kórsetedi. Búginde bizde 39 bólimshe bar, onda 17 dáriger jumys isteıdi. 15 terapevtik jáne 8 pedıatrııalyq bólim ashyldy. Turǵyndar sanynyń kóptiginen pedıatrııa bólimin japqan joqpyz», - dep túsindirdi M. Bısenova.
Aıta keteıik, №4 emhana - 2017 jyldan bastap, tsıfrlandyrý elementterin engizgen qaladaǵy jalǵyz klınıka.
«2017 jyldan bastap KIIS júıesinde jumys istep kele jatyrmyz. Ótken jyldyń mamyr aıynan beri ambýlatorlyq karta tolyǵymen joıyldy. Barlyǵy 55 myń karta muraǵatqa kóshirildi. Búginde 2001 jyldan 2005 jylǵa deıin týǵan balalarǵa arnalǵan elektrondy kartalar tolyǵymen jasaqtaldy. Halyqtyń 98% densaýlyq pasportynyń derekter bazasyna ense, 16% «Damý-Med» qosymshasyn paıdalanady», - dedi M.Bısenova.
Mınıstr atalmysh emhananyń jumysyna jaqsy baǵasyn berdi. Sondaı-aq, ol jas dárigerlerdi qoldaý týraly sóz qozǵady.
«Byltyr qazan aıynda Memleket basshysy dárigerlerdi yntalandyrýdy tapsyrdy. Jyldyń birinshi jartysynda barlyq medıtsına qyzmetkerleriniń eńbekaqysyn kóterý úderisin baqylaımyz. Maýsym aıynan bastap medıtsına qyzmetkerlerine 30% jalaqy tólenetin bolady. Memleket basshysy jalaqyny bir aı buryn arttyrýdy tapsyrdy. Qarajat bar, ıaǵnı, jańa maýsymnan bastap biz jalaqyny kóbeıtýge daıynbyz», - dedi E.Birtanov.
E. Birtanovtyń aıtýynsha, óńirde kadr jetispeýshiligi jáne zamanaýı qural-jabdyqtarmen qamtamasyz etý máselesi aıtarlyqtaı bilinedi. Degenmen, atalǵan emhananyń basshylyǵy bul máseleni sheshýge úshin Astana qalasymen 5 jáne Qaraǵandymen 9 kelisimshart jasady. Olardyń bireýi terapevt bolsa , qalǵany - jalpy tájirıbe dárigeri.
«Shyndyǵynda, bir dárigerdiń eki jumysty qatar isteýi kezdesedi. Keıde aýdandyq medbıkelerge de osyndaı júkteme túsedi. Árıne, dárigerlerdiń kóp aqsha tabýyna qarsy emespiz, biraq dárigerlerge ondaı kóp jumys júkteýge bolmaıdy. Bıyldan bastap biz dáriger mamandyǵyn memlekettik grant boıynsha oqyǵandardyń úsh jyl boıy turaqty jumys isteýin qadaǵalaıtyn bolamyz. Osy jyly bizde bir jarym myńnan astam dáriger jumysqa kirisedi. Jyl saıyn 5-6 myń dáriger bitiredi, biraq olardyń kópshiligi jeke sektorǵa ketip qalady. Qazir olarmen jumys júrgiziledi. Jergilikti bılik tarapynan jas mamandarǵa qoldaý kórsetýdi talap etemiz. Sondyqtan ákimder jas mamandardy qoldaý kerek. Premer-mınıstr aýyldaǵy jas mamandardy qoldaý sharalaryn júıeleýdi tapsyrdy. Olardyń ishine turǵyn úımen qamtamasyz etý kiredi», - dep túıindedi E.Birtanov.
