Ákimdik: Respýblıka boıynsha eń arzan nan Tarazda
TARAZ. QazAqparat - Jambyl oblysynda nan baǵasy turaqtandy, dep habarlaıdy «QazAqparat» HAA.
Aıta keteıik, qarashanyń ortasyna taman Tarazdaǵy saýda oryndarynda nan baǵasy qymbattap, bir bólkeniń baǵasy 75 teńgege jetken bolatyn. Onyń sebebi birneshe óndirýshi jergilikti bılikpen kelispesten bıdaı men un baǵasynyń kóterilýine baılanysty nan baǵasyn da 10 teńgege ósirip jibergen.
«Qazir biz jaǵdaıdy rettedik, nan 60-65 teńge turady», - dedi «QazAqparat» tilshisine Jambyl oblysy ákiminiń birinshi orynbasary Bekbolat Orynbekov.
«Biz kásipkerlerdiń barlyǵymen sóılestik. Olardyń barlyǵy jaǵdaıdy túsinip otyr. Óıtkeni kelesi jyldan bastap, kommýnaldyq tólemder men energııatasymaldaý baǵasy tómendegeli otyr. Sondyqtan nan baǵasyna qatysty jaǵdaı turaqty»,-dedi ol.
Osy ýaqytqa deıin nan baǵasy Tarazda respýblıka boıynsha eń arzan bolyp keldi. 2012 jyldan bastap, birneshe naýbaıhana turaqtandyrý qorymen birlesip, shıkizatty tómen baǵamen alyp kelgen. Osyǵan qaraı nan baǵasy da qymbat emes edi. Búginde Tarazdaǵy turaqtandyrý qorynan arnaıy dúkenderge nan 55 teńgeden jetkizilip, 58 teńgeden satylyp keldi.
Qazan aıyndaǵy málimetter boıynsha, bıdaı unynan daıyndalǵan 1 keli nannyń baǵasy 100 teńge bolyp keldi. Bul respýblıka boıynsha eń tómen baǵa. Bul rette nannyń salmaǵy 600-650 gramm boldy.
Oblys ákimdiginiń ókilderi turǵyndarǵa qoldaý kórsetý maqsatynda Tarazdyń Ortalyq alańynda aýyl sharýashylyǵy jármeńkeleri uıymdastyrylyp kelgendigin aıtady. Ol jerde taýarlardyń baǵasy naryqtaǵydan 15-20 paıyz tómen baǵamen saýdalanady.
Osyǵan deıin Jambylda 14 kolledjdiń basshysy tártiptik jazaǵa tartylý múmkindigi týraly jazdyq.
