Ákimdik qyzmetkerleri Shalqar Aqymǵalıevtiń otbasyna bir kúndik jalaqysyn aýdarady

ATYRAÝ. QazAqparat - Atyraý oblystyq ákimdiginiń qyzmetkerleri bir kúndik eńbekaqysyn qaıtys bolǵan polıtseı Shalqar Aqymǵalıevtiń otbasyna aýdarady. Sonymen qatar, qala ákimi Alımuhammed Quttumuratuly marqumnyń áriptesi Rústembek Súndetovti qabyldap, Qurmet gramotasyn tabystady jáne adam qutqarýdaǵy batyl áreketi úshin alǵys aıtty, dep habarlaıdy QazAqparat tilshisi.

Búgin Atyraý qalasynyń ákimi Alımuhammed Quttumuratuly polıtsııa kishi leıtenanty Rústembek Súndetovpen kezdesti. Ol 21 naýryz kúni keshkisin kópirden sekirgen áıeldi qutqaryp qalǵan bolatyn. Ókinishke qaraı, sol túni qasynda bolǵan áriptesi Shalqar Aqymǵalıevtiń ǵumyry úzildi. Rústembek joldasynyń denesin ózennen ózi alyp shyqqysy kelip, kóp izdegenimen taba almady. 3 gradýstan aspaıtyn temperatýradaǵy sýyq sýdan 30 jastaǵy kishi leıtenant Súndetov jaǵalaýǵa aman shyqty. Rústembek úılengen, eki balanyń ákesi.

«Búginde qoǵamda polıtsııaǵa qatysty qalyptasyp qalǵan teris stereotıp bar. Quqyq qorǵaý organdary qyzmetkerleri týraly syndy jıi estımiz. Sizder, ómirden ótken Shalqar Aqymǵalıev ekeýińiz qazaqstandyq polıtsııa týraly sondaı túsinikterdi teriske shyǵardyńyzdar. Óskeleń urpaqqa úlgi boldyńyzdar, ata-ananyń tárbıeli uly ekendikterińizdi kórsettińizder, sizderdi barsha el maqtan etedi», -dedi Alımuhammed Quttumuratuly.

Atyraý qalasynyń ákimi Rústembek Súndetovke qurmet gramotasyn tabystap, batyl áreketi úshin alǵys bildirdi.

Eske salsaq, 22 naýryzda Atyraý oblysynyń turǵyndary erlikpen qaza tapqan polıtsııa qyzmetkeri Shalqar Aqymǵalıevti bir mınýt únsizdikpen eske alyp, rýhyna taǵzym etken bolatyn. Batyrdy sońǵy saparyna shyǵaryp salý rásimine júzdegen azamattar jınaldy. Aımaq basshylyǵy men oblystyq polıtsııa departamenti polıtseıdiń jerleý rásimine baılanysty shyǵyndardy kóterdi.