Ákimdik qaraǵandylyqtardy qysqa erte bastan qamdanýǵa shaqyrdy
QARAǴANDY. QazAqparat - Qaraǵandy oblysynda qatty otyn satylatyn oryndardyń kartasy jasaldy. Bılik turǵyndardy qazirden bastap qysqa kómir qamdaýǵa shaqyryp jatyr, dep habarlaıdy QazAqparat tilshisi oblys ákimdiginiń baspasóz qyzmetine silteme jasap.
Interbelsendi kartanyń kómegimen jaqyn mańdaǵy kómir satatyn kásiporyndardy, tipti olardyń telefon nómirin de bilýge bolady. Qazirgi kezde bir tonna kómirdiń baǵasy 7 000-15 000 teńge aınalasynda.
Bıyl qatty otyndy óndirý kólemin arttyrý josparlanǵan. Máselen, «Shubarkól kómir» AQ kómir basseınderinde kommýnaldyq-turmystyq qajettilikter úshin 4,8 mıllıon tonna kómir óndiriledi. Byltyr bul kórsetkish 3,9 mln tonna bolatyn.
