Ákimdik halyqty Jaıyqtaǵy zertteý jumystaryn baqylaýǵa shaqyrdy
Jaıyq-Kaspıı Orxýs ortalyǵynyń Óńirlik koordınatory Shynar Іztileýova kezdesýdiń maqsatyn aıqyndady. Onyń sózinshe, atalmysh dóńgelek ústel pikir almasý, oqıǵaǵa qatysty jurtshylyqtyń alańdaýshylyǵyn týyndatatyn máselelerdi túsindirý, ári qaraı áreket etý úshin tıisti sharalardy naqtylaýdy kózdeıdi.
Atyraý oblystyq ishki saıasat basqarmasynyń basshysy Jasulan Bısembıev ótken jyly Orxýs ortalyǵymen birge Jaıyq jáne Qıǵash ózenderiniń túbin tereńdetý boıynsha qoǵamdyq tyńdaý ótkenin atap ótti. Búgingi balyq qyrylýyna qatysty másele de - qoǵamnyń baqylaýynda.
«Memlekettik saıasat memlekettik organdardyń eseptiligin damytýǵa, barlyq úderisterdiń ashyqtyǵyna baǵyttalǵan. Sondyqtan, asa mańyzdy memlekettik jobalardy biz qoǵamdyq baqylaýǵa alýǵa umtylamyz. Biz jurtshylyqtyń talqylaýǵa belsendi jáne syndarly qatysqanyn qalaımyz»,- dedi Jasulan Bısembıev.
Oblystyq ishki saıasat basqarmasynyń basshysy qatysýshylardy óz pikirlerin bildirip, jappaı balyq óliminiń aldyn-alý sharalary boıynsha usynystarberýge shaqyrdy.
Saýaldar men usynystar kóp boldy. Eń bastysy - balyq qyrylýynyń sebepterin aıtyp, kim kináli ekenin anyqtaý. Ázirge bul saýaldarǵa eshkim tushymdy jaýap bere almaı otyr.
«Qazir Qazaqstan Respýblıkasynyń Qylmystyq kodeksiniń eki babyboıynsha sotqa deıingi tergeý amaldary júrgizilip jatqanyn bilesizder. Sot saraptamalary taǵaıyndaldy. Sáýir aıynda tergeý nátıjeleri jarııalanady dep oılaımyn», - dep túsinik berdi oblystyq balyq sharýashylyǵy basqarmasynyń basshysy Artýr Sadybekuly.
Budan buryn habarlanǵandaı, Jaıyqty jan-jaqty zertteý úshin oblystyq bıýdjetten 80 mıllıon teńge bólindi. Ol qalaı ótkizilýi tıis, ne nársege aldymen kóńil bólý qajet, munymen kim aınalysady, ol ne úshin jasalýy kerek, buǵan kim basa nazar aýdarýy kerek- bul saýaldardyń jaýabyn tabý úshin bılik jurtshylyqty osy jumyspen aınalysatyn áleýetti merdigerlerge qoıylatyn talaptardy qalyptastyrýǵa belsene qatysýǵa shaqyrdy.
Qoǵamdyq birlestik ókilderi ózen sýynyń sapasy jáne onyń adam densaýlyǵyna qaýipsizdigi týraly kún saıyn esep jarııalap otyrýdy usyndy.
Búginde ondaı múmkindik bar. atpress.kz aqparattyq saıtynyń «Atyraý qoǵamdastyǵy» arnasynda kez kelgen adam Jaıyq ózeniniń sý synamalarynyń zerthanalyq taldaýy boıynsha apta saıyn tolyq aqparat ala alady. Zerthanalyq taldaý negizgi ıondar, bıogendi, organıkalyq zattar men aýyr metaldardy qosa alǵanda, sý sapasynyń 41 kórsetkishi boıynsha júrgizildi.
«Biz eshteńeni jasyrǵymyz kelmeıdi - kerisinshe, osy jaǵdaı boıynsha obektıvti aqparat alýǵa múddelimiz. Bárimiz osy aımaqtyń turǵyndarymyz, osy sýdy iship jatqandyqtan, bolashaǵymyz barshamyzdy alańdatady», - dedi Jasulan Bısembıev.
Balyq ónerkásibiniń ardageri Bostan Súleımenov Jaıyq-Kaspıı basseınindegi balyq popýlıatsııasynyń jaǵdaıy týraly óz pikirin bildirdi.
«Balyq aýlaý lımıtin bólý máselesin qaıta qaraý qajet. Azaıtý baǵytynda. Árıne, ǵylymı usynymdar negizinde. Búginde bul máseleni sheshý qajet. Aýyl sharýashylyǵy mınıstrligine habarlasý kerek. Balyqtyń ólimine qatysty jaǵdaı jalpy qorǵa áser etpeıdi deýdiń qısyny joq. Balyq qorlaryn kóbeıtýdi qamtamasyz etý úshin jas balyqtardy qurtyp almaý qajet. Bul úshin taıaýdaǵy úshjylda ýaquıashyqty tormen balyq aýlaýǵa tyıym salý qajet. Bundaı tájirıbe Jaıyqta kókserke men raýshannyń kúrt azaıǵanda qoldanylǵan bolatyn», - deıdi Bostan Súleımenov.
Qoǵamdyq tyńdaý barysynda oblysta balyq aýlaý máselesin biletin qyzmetkerlerdiń jetispeýshiligi týraly aıtyldy. Shyndyǵy sol - bul salada, kásibı daıyndalǵan mamandar, aldymen, ıhtıologtar jetispeıdi. Sońǵy eki jylda oblys ákimdigi óńirge qajetti mamandardy daıarlaý úshin bilim granttaryn bólip keledi. Bıyl balyq sharýashylyǵy salasyna qajetti mamandardy daıarlaýǵa granttar bólý týraly sheshim qabyldandy.
Dóńgelek ústeldiń qorytyndysy boıynsha memlekettik organdarǵa usynymdar men usynystar jasaqtaldy. Máselen, ózendi zertteýge mindetti túrdee qoǵamdyq sarapshylardy tartý jáne halyqqa esep berý. AMÓZ-diń Jaıyqty lastaný jaǵdaıyna yqtımal áserin anyqtaý. Balyq popýlıatsııasyn saqtaý jáne qalpyna keltirý jónindegi eń basty sharalardy anyqtaý. Ózen sýynyń jaı-kúıi, «AtyraýSýArnasy» JShS aýyz sýy sapasy týraly aqparatqa tolyq jáne ýaqtyly qoljetimdilik bolýy qajet. Sondaı-aq, qoǵamdyq belsendiler Jaıyq ózenindegi zertteýler jumysy barysynda baǵdarlamalar men jobalarǵa bólingen bıýdjet qarajatynyń paıdalanylýyn monıtorıng jasaıtyn jumysshy top qurýdy usyndy.
