Ákimdik ǵımaratyna kólikpen kirgen júrgizýshiniń inisi: Bul adamı faktor
AQTÓBE. QazAqparat - Aqtóbe qalasynyń turǵyny Baýyrjan Anapın oblys ákimdiginiń ǵımaratyna kóligimen kirip ketken edi. Búgin Baýyrjan Anapınniń inisi Baqytjan Anapın oqıǵanyń mán-jaıyn aıtyp berdi, dep habarlaıdy QazAqparat tilshisi.
«Bul adamı faktor. Іnim Baýyrjannyń otbasylyq jaǵdaıy sońǵy kezderi qıyndap ketti. Áıelinen ajyrasyp ketken soń ishimdikke áýes bola bastady. Bul jerde saıası, dinı jaǵdaılarǵa burmalap, boljam jasaýdyń qajeti joq. Ol kezinde salyq basqarmasynda jumys istegen. Qazir ol kásipkerlikpen aınalysady. Balalary bar. Bireýi Chehııada oqyp jatyr. Ajyrasý er adamǵa qıynǵa soǵady emes pe?!.»,- dedi Baqytjan Anapın.
Anapınderdiń biri Aqtóbe qalasynda, ekinshisi Shalqar qalasynda turatyn bolǵan soń otbasylyq jıyndarda ǵana kezdesedi.
«Ózim Aqtóbe qalasyna barmadym. Biraq tergeý júrip jatqanyn bilemin. Kólik óziniki. Sýretke túsirip, «súıinshi» suraǵandaı áleýmettik jelige salyp jibergen adamnyń oıyn túsinbedim. Іnim aıyppul tólep, jazasyn alady. Al ákimdik ishinde turyp sýretke túsirip, ony jarııalaǵan adam uıatty oılamaǵan eken. Halyq arasyna iritki salyp, túrli oı týǵyzǵany qatelik boldy»,- dedi Baqytjan Anapın.
