Ákimdik esepshisi jumysqa barmaı-aq jalaqy alyp júrgen
QARAǴANDY. QazAqparat - Qaraǵandy oblysy Ulytaý aýdanyndaǵy Qarsaqpaı aýylynyń ákimi esepshiniń jumysqa kelmeı-aq jalaqy men syıaqylaryn alyp otyrýyna jol bergen, dep habarlaıdy «QazAqparat» HAA tilshisi.
Jergilikti ákimshilik qyzmetkerleri ákimdik esepshisin jumysta kórmeıtin, biraq esep tabeli boıynsha ol kúnde segiz saǵat «jumysta otyrǵan». Bul memlekettik organdaǵy jospardan tys tekseris kezinde áshkere boldy.
«Tekseris barysynda ákim Nurǵazınov jumysqa kelmeı júrse de esepshige aılyq jalaqysyn tólep otyrǵany anyqtaldy. Aýyl ákimi munysyn esepshiniń kompıýteri ákimdikten góri úıinde ınternetke jyldam qosylatynymen túsindirdi», - deıdi Qaraǵandy oblystyq memlekettik qyzmet isteri sybaılas jemqorlyqqa qarsy is-qımyl departamentiniń baspasóz qyzmetindegiler.
Departamenttiń Etıka keńesi qyzmettik tekseris júrgizdi. Keńes músheleriniń kópshiligi Ulytaý ákiminiń basshylyǵynda tártiptik jaýapqa tartýǵa usyný týraly sheshim qabyldady.
