Ákimdik denesin kúıik shalǵan balany baqylaýǵa aldy - Almaty oblysy

ALMATY. QazAqparat - Denesin kúıik shalǵan 7 jastaǵy balanyń jaǵdaıyn jergilikti ákimdik baqylaýǵa aldy. Bul týraly QazAqparat tilshisine Almaty oblysy ákiminiń baspasóz hatshysy Ǵalymurat Júkel aıtyp berdi.

Qazir 7 jastaǵy bala Almaty oblysy Talǵar aýdanynda turyp jatyr. 2015 jyly úıde pesh jarylyp, balanyń keýde tusyn bet aýzyn kúıik shalǵan.

Aıta keteıik, qoǵam belsendisi Arýjan Saın áleýmettik jelide denesin kúıik shalǵan, ózdiginen aýzyn jaba almaıtyn bala týraly jazba qaldyrǵan bolatyn. 

 «SOS! Sańyraýlar men soqyrlar eli... Denesiniń jartysyn 1,2,3,4 dárejedegi kúıik shalǵan bala turyp jatyr. Buryn oblystyq aýrýhanada emdelgen. Qazirgi jaǵdaıy óte múshkil. Terisi jıyrylyp, tartylǵan kezde balanyń janyna batady. Buryn mundaı balalardy shetelge emdeýge jiberetinbiz. Olarǵa jasandy teri japsyrylady. Ol balamen birge ósýi tıis. Bizde ondaı emdeý jasalmaıdy. Balanyń aýzy jabylmaıdy, saýsaqtary jıyrylyp qalǵan. Oblystyq, aýdandyq dárigerler qaıda qarap otyr?», - dedi Arýjan Saın.

Ákimdik ókiliniń aıtýynsha, balanyń múshkil hali qoǵamda úlken shý týǵyzdy. Sol sebepti jergilikti ákimdik jaǵdaıdy baqylaýǵa aldy.

 «Ázirge qyzmettik tekserý bastalǵan joq. Bireýdi jazalaý týraly áńgime aıtýǵa áli erte. Birinshi kezekte balany aýdandyq aýrýhanaǵa jatqyzýǵa kúsh salyp jatyrmyz. Eń aldymen balany emdeý kerek. Bala medıtsınalyq kómekke muqtaj. Odan ári qalaı emdeý kerektigi kelesi másele», - dedi Ǵalymurat Júkel.

Onyń aıtýynsha, balanyń anasy ishimdikke salynyp ketken. Qazir bılik ókilderi ony májbúrlep emdeýge jaýyp tastady.

Qazir bala Talǵar aýdanynda apasymen turyp jatyr.

«Apasy balany aýrýhanaǵa jatqyzýdan bas tartyp otyr. Ol balanyń jaǵdaıy jaqsy deıdi. Biraq sýretke qarasaq,  balaǵa kómek kerek ekeni aıqyn. Balany emdeýge jatqyzǵan soń ǵana mundaı jaǵdaıǵa jetkizgen tulǵalar jaýapkershilikke tartylady. Qamqorlyqqa alý organdary, ata-anasynyń jaýapkershiligi eskeriledi», - dedi Ǵalymurat Júkel.

Óz kezeginde oblystyq aýrýhana ókilderi balanyń qajetti em qabyldaǵanyn, qalǵan em-sharany ambýlatorııalyq jaǵdaıda jalǵastyrýy tıis bolǵanyn habarlady.

Aıta keteıik, «Mıloserdıe» qoǵamdyq qorynyń ókilderi janashyr azamattardan qoǵamdyq qor jınaýdy bastap ketti. Qor jetekshisi Arýjan Saın balany shetelge emdetý kerektigin alǵa tartýda.