Ákimdik Aıagózdegi ortalyqty Óskemenge kóshirýge qatysty ustanymyn bildirdi
NUR-SULTAN. QazAqparat – Aıagózdegi 4 balanyń ólimi tirkelgen ortalyqty Óskemenge kóshirýge qatysty Shyǵys Qazaqstan ákimdigi pozıtsııasyn bildirdi. Ortalyqtyń máselesi Úkimet janyndaǵy kámeletke tolmaǵandardyń isi jáne olardyń quqyqtaryn qorǵaý jónindegi vedomstvoaralyq komıssııanyń otyrysynda talqylandy, dep habarlaıdy QazAqparat tilshisi.
«Aıagóz qalasynda ornalasqan Balalarǵa arnaıy áleýmettik kómek kórsetý ortalyǵyn Óskemenge kóshirý jóninde aıtar bolsaq, bul másele birneshe ret talqylandy. Jalpy, oblys basshylyǵynyń kelisimimen ortalyqty kóshirý máselesin qoldamaıtynymyzdy aıtqym keledi. Argýmentter mynadaı: birinshiden, balalar ol jerde týǵannan beri ómir súrip keledi. Ortalyqtyń burynnan bergi mamandarynan qol úzetindikten ol jerdegi balalar psıhologııalyq soqqy alýy múmkin. Sonymen qatar, Óskemen qalasynda sol mekemeni ornalastyratyn nysan joq. Oǵan qosa oblys ortalyǵynyń ekologııalyq ahýaly ondaǵy balalardyń densaýlyǵyna qaýip tóndirýi de múmkin», - dedi ShQO ákiminiń orynbasary Marhabat Álisher.
Onyń aıtýynsha qalalardaǵy sondaı mekeme qyzmetkerleriniń ortasha aılyǵy biliktiligi joǵary mamandardy tartýǵa jetpeıdi.
Bul máselege qatysty mınıstr Bilim jáne ǵlyym mınıstri Ashat Aımaǵambetov oblys ákimdigi men komıssııa ókilderi tyǵyz jumys júrgizip jatqanyn aıtyp ótti.
«Bul máselege qara jáne aq prızma turǵysynan qaramaý kerek. Álbette ilgeri basqan jumystar da, bizdiń sáıkese bermeıtin pozıtsııalarymyz da bar. Aıagózdegi ortalyq boıynsha eń mańyzdy másele – balalardyń joǵary tehnologııaly medıtsınaǵa qol jetkizý alýynda. Onda bolǵan oqıǵalar bul problemanyń tezirek sheshilýin talap etedi. Másele onyń tym alysta bolǵanynda. Kerekti kómekke qoljetimdilik - basty mindet. Balalar bilikti kómek alýy kerek. Sol sebepti taǵy bir márte osy máseleni pysyqtaýdy tapsyramyn. Komıssııa tıisti ózgerister týraly baıandama jasaýy kerek. Birqatar suraq boıynsha qosymsha qajetti sheshim qabyldanýǵa tıis», - dedi ol.
Eske sala ketsek jaqynda atalmysh ortalyqtaǵy tórt balanyń ólimine qatysty sot úkimi shyqqan bolatyn.
