Ákimdik Almatyny karantınge jabý týraly: Eshkimge ruqsat berilmeıdi
ALMATY. QazAqparat – Almaty ákiminiń birinshi orynbasary Erlan Qojaǵapanov dárigerler, jýrnalıster, ákimdik qyzmetkerleri sııaqty shuǵyl qyzmet ókilderi qalaǵa kire almaıtynyn aıtty, dep habarlaıdy QazAqparat tilshisi.
«Eshqandaı ruqsat qaǵazy bolmaıdy. Komıssııa qalaǵa mańyzdy júk tasıtyn kólikter men qoǵamdyq tártipti qamtamasyz etetin kólikterdiń kirýine ǵana ruqsat beretin bolady. Qala jabyq bolýy tıis. Eshkimge ruqsat berilmeıdi. Karantın talaby –osy. Biz bul vırýsty osy qalada jeńýimiz kerek», - dedi ol.
Onyń aıtýynsha, búgin túnde avtokólik pen avtobýstarǵa kirýge, shyǵýǵa tyıym salynady.
«Tek arnaıy qyzmet ókilderi ǵana kirip shyǵady. Bizde qoqys polıgony Qarasaı aýdanynda ornalasqan. Sol jaqqa qoqys tasıtyn 330 kólik shyǵarda kirerde sanıtarlyq óńdeýden ótedi. Olardyń barlyǵyn jol patrýl kólikteri alyp júredi. Mundaı arnaıy qyzmet jumys jasamasa qalanyń tirshiligine nuqsan keledi. Qazir bizge ınkassatsııa kólikteri júginip jatyr. Olardyń da qyzmeti qarjyǵa baılanysty bolǵandyqtan, mańyzdy bolyp otyr. Olardy da ótkizetin bolamyz. Alaıda olardyń barlyǵy 27 blok postta sanıtarlyq óńdeýden ótetin bolady», - dedi ol.
Al temir jol jáne avıa baılanys 22 naýryzda túngi 00.00-den bastap jabylady.
«Bul sheshim bizge ońaıshylyqpen berilip jatqan joq. Qanshama múmkindigi shekteýli adamdar, qarııalar, balalar bar bılet alǵan. Búgin memkomıssııa barlyq óńirlik ákimderge Almaty men NurSultannan shyqqan adamdardy arnaıy zararsyzdandyrý quraldarymen jáne dene qyzýyn tekserý arqyly qabyldaýǵa nuqsaý berdi», - dedi Erlan Qojaǵapanov.
