Ákimdik «Aqtóbe» fýtbol klýbyn ne úshin satyp jatqanyn túsindirdi
AQTÓBE. QazAqparat - Aqtóbe ákimdigi fýtbol klýbyn jekeshelendirý men fýtbolshylar aldyndaǵy qaryz máselesi týraly aıtyp berdi, dep habarlaıdy QazAqparat tilshisi.
Elimizde orny erekshe «Aqtóbe» fýtbol klýby 7 jylǵa senimgerlik basqarýǵa berilip, keıin satylatyny týraly aqparat shyqty. Buǵan deıin habarlaǵanymyzdaı, klýb quny - 100 mıllıon teńge.
Al búgin oblystyq qarjy basqarmasy klýbtyń satylý sebebin túsindirdi.
«Óńirde 2016-2020 jyldarǵa arnalǵan jekeshelendirý kestesi belgilendi. Keshendi josparda 9 nysan bar. Sonyń biri - «Aqtóbe» FK. Jekeshelendirý erejesine sáıkes komıssııa bastapqy quny 100 mıllıon teńge bolady dep sheshti. Saıtqa habarlandyrý berildi. Qyzyǵýshylyq tanytyp otyrǵan adamdar týraly aıta almaımyz. Al ótpegen jaǵdaıda ekinshi kezeń bar. Sol kezde taǵy aqparat beremin. Bankrottyq týraly eshteńe aıta almaımyn»,- deıdi oblystyq qarjy basqarmasynyń basshysy Gúlnaz Sısenova.
Al oblystyq dene shynyqtyrý jáne sport basqarmasy klýbtyń jalpy qaryzy týraly eshqandaı málimet aıta almady.
«2018 jyly fýtbolshylar aldynda qaryzymyz joq. Olar jalaqysy men syıaqysyn alyp otyr. Qaryz 2014-2016 jyldary aralyǵynda jınalǵan. Negizi bári jalaqyny alǵan tek syıaqylary el zańnamasyna saı eseptelmegen. Qaryz týraly naqty aıta almaımyn. Al basqarma burynǵy fýtbolshylarǵa qatysty azamattyq aryz túsirgen edi. Kelisim júrip, aryz qaıtaryp alyndy»,- dedi basqarma basshysy Meırambek Mahambetov.
